SQO-da «Keń dala 2» baǵdarlamasy boıynsha 40-qa jýyq fermer nesıe aldy

PETROPAVL. KAZINFORM – Dıqandar úshin yńǵaıly «Keń dala 2» baǵdarlamasyna el  boıynsha búginge deıin 300-den astam kásipker qatyssa, sonyń 38-i – Soltústik Qazaqstan oblysynan. Bul – 2,8 mlrd teńge. 

Kóktemgi egin egý men kúzgi jıyn-terim jumystaryn qarjylandyrýǵa baǵyttalǵan «Keń dala 2» baǵdarlamasy boıynsha nesıe alǵandardyń biri – «Poltavskoe» JShS. SQO-daǵy sharýashylyqtyń 15 myń ga jýyq alqaby bar, dándi, maıly daqyl, jem-shóp te egedi. 

«Buǵan deıin «Keń dala» baǵdarlamasy boıynsha 400 mln teńge aldyq. Endi jańa «Keń dala 2» baǵdarlamasy shyǵyp otyr. Ol arqyly biz 200 mln teńge aldyq. Óte yńǵaıly baǵdarlama, óıtkeni qaryzdy kúzde, baǵa joq ýaqytta emes, kóktemde qaıtarýǵa bolady. «Keń dala 2» baǵdarlamasy arqyly qarajat belgili bir maqsatqa beriledi. Máselen, alǵan aqshanyń 90 mln teńgesine myń tonna tyńaıtqysh alyp, osylaısha 40%-yn tóledik. 30% gerbıtsıd alýǵa jumsaldy. Bul qarajatty jumysshylardyń eńbekaqysyn berýge paıdalanýǵa bolady. Sharýalar úshin óte qolaıly, oılastyrylyp jasalǵan baǵdarlama. Dıqandarǵa kómek kerek, byltyr oraq qıyn jaǵdaıda ótti. Kóktemde sý tasqyny boldy, ári jaýyn-shashyndy, qosymsha shyǵynǵa batyp jatyrmyz», - deıdi «Poltavskoe» JShS dırektorynyń orynbasary Erlan Zikirın.

Aqqaıyń aýdanyndaǵy sharýashylyq memlekettiń qoldaýy nátıjesinde isin dóńgeletip qana qoımaı, aýyldyń damýyna da úles qosyp otyr. 

«Biz 200-300 mln teńgege jýyq qarajatty áleýmettik máselelerdi sheshýge jumsaımyz. Baspanalar turǵyzyp jatyrmyz. Ár baspananyń ózindik quny orta eseppen 16 mln teńgege shyqty. Biz ony jumysshylarymyzǵa 10 jylǵa bólip tóleý múmkindigimen 4,5 mln teńgege berdik. Osyndaı 11 úı saldyq. 120 sharshy metr, ishinde sýy, kárizi bar. Byltyr balabaqshany paıdalanýǵa berdik. Joldardy jónge keltirdik. Qazir aýylda qoǵamdyq monsha, medıtsınalyq pýnkt jumys isteıdi», - deıdi Erlan Zikirın.

«Keń dala 2» baǵdarlamasy boıynsha kóktemgi egin egý men kúzgi jıyn-terim jumystaryn qarjylandyrýǵa bıyl el boıynsha 300 mlrd teńge bólingen. Jeńildetilgen nesıeni «Agrarlyq nesıe korporatsııasy» AQ fılıaldarynan, ekinshi deńgeıli bankterden, kredıttik seriktestikterden, mıkroqarjy uıymdarynan jáne áleýmettik-kásipkerlik korporatsııalar men óńirlik ınvestıtsııalyq ortalyqtar arqyly alýǵa bolady.

«Qaryz alýshylar úshin jeńildetilgen jyldyq syıaqy mólsherlemesi 5% deńgeıinde bolady. Buǵan deıin fermerler paıyzdyq mólsherlemeni qysqartý úshin jáne sýbsıdııa alý úshin jergilikti jerlerdegi aýyl sharýashylyǵy basqarmalaryna júginýge, jańa mindettemelerge qol qoıýǵa, qarjynyń bólingenin kútýge májbúr bolǵan. Kepilge qoıatyn múlik izdep qajet emes, qaryz somasynyń 85%-yn «Damý» kásipkerlikti damytý qory kepildendiredi», - deıdi «Agrarlyq nesıe korporatsııasy» AQ basqarma tóraǵasynyń orynbasary Márlen Nábıev. 

«Agrarlyq nesıe korporatsııasy» AQ baspasóz qyzmetiniń málimetinshe, SQO-ǵa «Keń dala 2» baǵdarlamasy boıynsha 50 mlrd teńge bólingen. Qazirgi ýaqytta 134 fermerden 14,7 mlrd teńgeniń ótinimi túsken. 

Buǵan deıin SQO-da 52 medıtsınalyq uıym ÁMSQ aıasynda qyzmet kórsetetinin aıtqan edik.