SQO-da kelýshini teksermegen 50 shaqty kásiporyn Ashyq jobasynan shettetildi

PETROPAVL. QazAqparat – Soltústik Qazaqstan oblysynda Ashyq jobasyna 1 175 kásiporyn qosylǵan. Olardyń 48-i tıisti talaptardy oryndamaǵandyqtan eki aptaǵa shettetildi, dep habarlaıdy QazAqparat tilshisi.

SQO kásipkerlik palatasy baspasóz qyzmetiniń málimetinshe, ár eki apta saıyn óńirde Ashyq jobasynyń úzdikteri anyqtalady. Bul joly qosymshany adal qoldanǵandardyń ishinde fıtnes klýb, joǵary oqý orny, kınoteatr, dámhana men meıramhana bar.

«Soltúsikqazaqstandyqtar Ashyq baǵdarlamasyna belsendi qatysyp jatyr. Olar budan utpasa – utylmaıdy. Qyzmetkerleriniń, kelýshilerdiń densaýlyǵyna keletin qater azaıady. Al eger kásipkerler bul jobany adal qoldanatyn bolsa, ıaǵnı ár kelýshini tirkep otyrsa, olarǵa qosymsha jeńildikter beriledi. Qazir óńir «qyzyl» aımaqta. Úzdik atanǵandar eki apta boıy «sary» aımaqtyń talabymen jumys isteıdi: jumys isteý ýaqytyn jáne kelýshiler sanyn ulǵaıta alady», - deıdi SQO kásipkerler palatasy dırektorynyń orynbasary Marat Isqakov.

Mamandardyń aıtýynsha, 29 shildeden bastap Ashyq-qa qosylý talaptary jeńildetilgen.

«Endi kásipkerlerge QR kodty alý ońaı. Aımaqtyq palatalardyń qyzmetkerleri burynǵydaı ótinishti teksermeıdi. Nátıjesinde kásipkerler eki kúndi únemdeıdi. Taǵy jeti kúndi sanıtarııalyq normalarǵa sáıkestik qujattaryn kútýge joǵaltpaıdy. Sanıtarııalyq-epıdemıologııalyq baqylaý basqarmasy beretin bul qujat jumys isteýge ruqsat beredi, ony monıtorıngtik toptar reıd barysynda tekseredi, sol sebepti keıin mindetti túrde alý qajet», - deıdi SQO kásipkerler palatasynyń dırektory Álibek Áshmetov.

Ashyq jobasyna qosylǵan kásiporyn bir apta test rejımde jumys isteıdi. Keıin málimet jergilikti ákimdikterge memlekettik organnyń saıtynda jarııalanýy úshin beriledi.

SQO-da qazir Ashyq jobasyna 1 175 kásiporyn qatysqan, onyń 458-i test rejımde jumysyn bastady. Al qosymshaǵa qosylǵanymen, oǵan beıjaı qaraǵan 48 kásiporyn eki aptaǵa ýaqytsha shettetildi.