SQO-da kelinshek úsh saýnany jalǵa alyp, jeńgetaılyqpen aınalysqan
PETROPAVL. QazAqparat – Soltústik Qazaqstan oblysynda «Stop-trafık» jedel-aldyn alý is-sharasy aıasynda 10 jezókshe esepke alynyp, jeńgetaılyqtyń úsh deregi anyqtaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Petropavldaǵy úsh saýnany jalǵa alǵan 35 jastaǵy áıel onda kelýshilerge seksýaldyq sıpattaǵy qyzmetter usynǵan. Saýnalardyń ákimgerleri klıentter men jeńil júristi qyzdar arasynda belgili bir syıaqyǵa deldal bolǵan.
«Zańsyz bıznesti oblys aýdandarynyń biriniń turǵyny uıymdastyrdy dep kúdiktelýde. Atalǵan fakti «Jezókshelikpen aınalysýǵa arnalǵan prıtondar uıymdastyrý nemese olardy ustaý jáne jeńgetaılyq» baby boıynsha Sotqa deıingi tergep-tekserýlerdiń biryńǵaı tizilimine engizildi», - deıdi SQO PD Krımınaldyq polıtsııa basqarmasy bastyǵynyń orynbasary Marat Jumalıev.
Bul qylmys 24-26 naýryz aralyǵynda SQO aýmaǵynda ótken «Stop-trafık» jedel-profılaktıkalyq is-sharasy aıasynda anyqtaldy. Operatsııanyń eki kúni ishinde oblys aýdandarynda tártip saqshylary qaıyr suraýǵa qatysty 21 derekti anyqtady.
Internetke monıtorıng júrgizý barysynda «jezókshe» sanaty boıynsha 10 boıjetken anyqtalyp, esepke qoıyldy. Adam saýdasymen baılanysty qylmystardy jasaýǵa yqpal etetin aqparaty bar veb-resýrs anyqtaldy. Onyń domeni QR ІІM Krımınaldyq polıtsııa departamentine buǵattaý úshin joldandy.
