SQO-da keler jyly joǵary oqý oryndaryna jańa korpýstar salynady
PETROPAVL. QazAqparat – Soltústik Qazaqstan oblysynda joǵary oqý oryndarynyń básekege qabilettiligin arttyrý maqsatynda jańadan oqý korpýstary salynbaq. Bul jobalar óńirdi damytý baǵdarlamasyna engen, dep habarlaıdy QazAqparat tilshisi.
SQO ákimi baspasóz qyzmetiniń málimetine qaraǵanda, M.Qozybaev atyndaǵy Soltústik Qazaqstan ýnıversıtetiniń zamanaýı oqý-zerthanalyq korpýsynyń qurylysy keler jyly bastalady. 12 qabatty ǵımarat ornalasatyn jer daıyn tur, qajetti qarajat bólingen. Ol jerde osy zamanǵa saı jaraqtandyrylǵan 73 zerthana jumys isteıtin bolady. Jalpy ýnıversıtetke sońǵy 5 jyl boıy múlde keshendi túrde qondyrǵy alynbaǵan.
«Oblysqa kelgen memleket basshylaryn joǵary oqý ornyna arnaıy aparyp kórsettim. Jaǵdaımen tanystyrdym. Mashına jasaý fakýltetinde ZIL-130 kóliginiń maketi tur. Ondaı kólikter toqsanynshy jyldardan bastap shyǵarylmaıdy. Jıgýlı avtokóliginiń 6 modeli tur. Bizdiń maqsatymyz ýnıversıtetti básekege qabiletti etý. Eńbek naryǵynda óz ornyn tabatyn bilikti mamandardy ázirlep shyǵarý», - deıdi oblys ákimi Qumar Aqsaqalov.
Joǵary oqý orny Úndi elinen, Reseı, Qytaı, Grýzııa men Túrikmenstannan keletin stýdentterdiń sanyn 200-den asyrmaqshy. Jalpy, aldaǵy birer jylda munda bilim alatyn jastardyń sanyn 1,5 ese arttyrap, 10 myńǵa jetkizý mindeti tur.
«Keler jyly QR Ulttyq Ulan áskerı ınstıtýty úshin de zamanaýı úlgidegi oqý korpýstaryn salmaq nıettemiz. Qazirgi jaǵdaıy talapqa saı emes. Qarajat bar, jer bólindi. Nátıjesinde úsh úlken oqý korpýsy paıdalanýǵa beriledi», - deıdi Qumar Aqsaqalov.
Jalpy aldaǵy jyly bilim berý salasyna bólinetin qarajat 46% artpaq. Óńirde úsh aýysymda oqý máselesi tolyq sheshildi. «Bereke» yqsham aýdanynda 600 oryndyq mektep ashylsa, «Jas órken» yqsham aýdanynda 900 orynǵa shaqtalǵan oqý ordasynyń qurylysy aıaqtalýǵa jaqyn. Taǵy sondaı mektep Petropavldaǵy Ýálıhanov kóshesiniń boıynda salynyp jatyr. Bıyl 142 bilim berý nysany kúrdeli jóndelse, keler jyly bul jumystar jalǵasyn tappaq.
