SQO-da «QazSýShar» RMK fılıaly dırektory qyzmetkerleriniń syıaqysyn alyp kelgen

SQO Sybaılas jemqorlyqqa qarsy kúres qyzmetiniń málimetinshe, Agenttik pen Ekologııa, geologııa jáne tabıǵı resýrstar mınıstrliginiń ortaq buıryǵy negizinde Sý resýrstary komıtetiniń óńirdegi úsh vedomstvolyq uıym qyzmetiniń jemqorlyq qaterlerine syrtqy taldaý jasalyp, búgin qorytyndysy talqylandy.
«Taldaý barysynda memlekettik qyzmet kórsetýde ákimshilik kedergilerdiń barlyǵy, Sý resýrstary komıteti men negizgi kásiporyndar tarapynan vedomstvolyq uıymdardyń jumysyna ishki baqylaýdyń joqtyǵy anyqtaldy. Sonyń saldarynan birqatar qarjylyq zańbuzýshylyqtarǵa jol berilgen», - dedi SQO boıynsha Sybaılas jemqorlyqqa qarsy qyzmet basshysynyń birinshi orynbasary Nurlan Jaqın.
Máselen, «E-lıtsenzııalaý» portalynyń jumysy jetildirilmegendikten qyzmet alýshy arnaıy sý paıdalanýǵa ruqsat merzimin uzartýǵa qujatty elektrondy túrde bere almaıdy, sol sebepti Nur-Sultan qalasyna baryp júginýge májbúr. Al bul, mamandardyń pikirinshe, sharýashylyqtarǵa qosymsha ákimshilik kedergiler týǵyzady.
Al «QazSýShar» RMK SQF dırektorynyń isi sotqa jetti. Oǵan fılıal qyzmetkerleriniń atyna jalǵan issaparlardy rásimdep, jolǵa beriletin qarjyny, memlekettik satyp alý boıynsha atqarylatyn jumystarǵa tólenetin fılıal aqshasyn jáne qyzmetkerlerge syıaqyǵa bólingen qarjyny qaltasyna basty degen aıyp taǵyldy.
2016 jyly Komıtettiń SQO-daǵy taǵy bir vedomstvolyq uıymy – «Esil Sý» fılıaly dırektorynyń ústinen qylmystyq is qozǵaldy. Ol qubyrlardy zańsyz satqany úshin kináli dep tanyldy.
«Bul derekterdiń barlyǵy joǵary turǵan organnyń salǵyrttyǵyn, ishki baqylaýdyń bolmaǵanyn kórsetedi», - dedi Nurlan Jaqın.
Kezdesý barysynda aýyz sýdy sýbsıdııalaý máselesi de kóterildi. Óıtkeni, taldaý barysynda taza sýdyń baǵasy aýdandarda ártúrli bolyp shyqqan. Sybaılas jemqorlyqqa qarsy qyzmettiń «dılerlerdiń» jumysyna kóńili tolmaıdy.
Jumys toby anyqtalǵan olqylyqtarǵa baılanysty ortalyq jáne jergilikti deńgeılerde oryndaýǵa alty usynys ázirledi.