SQO-da Qazaqstandaǵy alǵashqy kárizdik tazartý stansasy iske qosylmaq
PETROPAVL. QazAqparat – Soltústik Qazaqstan oblysynda elimizdegi alǵashqy kárizdik tazartý nysanynyń qurylysy aıaqtalýǵa jaqyn. Joba aıasynda 26 km magıstraldik jeli salyndy, dep habarlaıdy QazAqparat tilshisi.
Elimizde teńdesi joq joba Ǵabıt Músirepov atyndaǵy aýdannyń ortalyǵy Novoıshımkada qolǵa alynǵan. 2018 jyly bastalǵan jabyq tıpti kárizdik tazartý nysanynyń qurylysyna 3 mlrd astam teńge jumsalǵan edi. Onyń qýaty táýligine 3 myń tekshe sarqyndy sýdy tazartýǵa jetetin bolady.
SQO ákiminiń orynbasary Sátjan Ablalıevtiń aıtýynsha, joba aıasynda 26 shaqyrym magıstraldi jeli tartyldy. Buryn aýdan ortalyǵynda úsh kárizdik-sorǵy stansasy bolsa, qosymsha taǵy tórteýi salyndy. Olar arqyly bar sarqyndy sý jańa jelige quıylyp, kárizdik tazartý nysanyna keledi.
«Qurylys aıaqtalǵannan keıin jańa nysannyń ıgiligin 10 myńnan astam adam kóredi. Joba 2023 jyly aıaqtalady dep josparlanǵan. Osyǵan uqsas joba Shal aqyn aýdanynyń Sergeevka qalasynda da qolǵa alynbaq. Qazirgi ýaqytta onyń jobalyq-smetalyq qujattary ázirlenip jatyr. Jalpy, turǵyndardyń áleýmettik-turmystyq jaǵdaılaryn jaqsartýdan bólek eldi mekenderde osyndaı jobalardy júzege asyrý aýyl sharýashylyǵynyń áleýetin arttyryp, aýyldarda mal sharýashylyǵyn damytýǵa múmkindik týǵyzady», - deıdi Sátjan Ablalıev.
Buǵan deıin SQO-da eldi mekenderdi sýmen qamtýǵa keler jyly 12,5 mlrd teńge jumsalatynyn aıtqan edik. Qazirgi ýaqytta 226 aýyl taza sýsyz otyr.
