SQO-da Qazaqstanda tyıym salynǵan dinı uıymnyń ókilderi-sektanttar ustaldy

PETROPAVL. QazAqparat – Soltústik Qazaqstan oblysynda polıtseıler almatylyq áriptesteriniń kómegimen sektanttardy ustady. Destrýktıvti dinı aǵymnyń ókilderi – sheteldikterdi el aýmaǵynan shyǵarý týraly sot sheshimin oryndamaǵan, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Qazaqstanda tyıym salynǵan dinı-totalıtarlyq sektany ustanýshy ekeý - Reseı azamaty. Polıtseıler olardy ustaý boıynsha jedel-izdestirý is-sharalaryn Almaty qalasynyń aýmaǵynda júrgizdi. 42 jastaǵy er adam men 60 jastaǵy áıel osyǵan deıin de jedel ýákilderdiń nazaryna ilikken. 2022 jyldan bastap olar Petropavl qalasyna birneshe ret kelip, jurtty sektalaryna shaqyrǵan, «rýhanı tazarýdy» ýáde etken.

Nátıjesinde osy jyldyń basynda ekeýine qatysty QR Ákimshilik quqyq buzýshylyq týraly kodeksiniń 489-babynyń 10-bóligi boıynsha hattamalar toltyryldy. Sot quqyq buzýshylarǵa 50 AEK mólsherinde aıyppul salyp, el aýmaǵynan shyǵýǵa mindettedi.

Alaıda sektanttar Reseıge emes, Petropavldan Almatyǵa ketip qalǵan. Ýaqyt óte kele olardy polıtseıler taǵy ta ustady. Birer kún buryn Petropavl qalasynyń mamandandyrylǵan ákimshilik soty olardy QR ÁQBtK-niń 490-babynyń 3-bóligi boıynsha ákimshilik jaýapkershilikke tartty. Zań buzýshylar el aýmaǵynan ákimshilik jolmen shyǵarylyp, endi 100 AEK kóleminde aıyppul tóleıdi jáne olarǵa QR aýmaǵyna kirýge 5 jylǵa tyıym salyndy.

Mamandardyń aıtýynsha, sektalar adamdy psıhofızıologııalyq jaǵynan azdyryp, synı turǵydan oılaý qabiletine de áser etedi.