SQO-da týrıster jıi baratyn tanymal aýyldyń turǵyndary sýdy satyp alyp iship otyr

Bul aýyl Taıynsha aýdanynda ornalasqan. Kezinde jer aýdarylǵan polıaktar aýyldyń negizin qurǵan. Katolık dinindegilerdiń qasıetti orny – «Qazaqstan juldyzy» altari ornalasqan ǵıbadathana bolǵandyqtan, munda kelýshiler qatary qalyń. Alaıda turǵyndar sany jyldan-jylǵa azaıyp barady. Onyń bir sebebi – aýyzsý tapshylyǵy.

Marııa Svejak bıyl 80 jasqa toldy. Іsher sýdy dúkennen satyp alady. 5 lıtrlik sý jalǵyz ózine 2 kúnge jetedi.

- 135 myń teńge zeınetaqy alamyn. Sonyń bir bóligi sýǵa ketedi. Úıdiń janyndaǵy qudyqtyń sýyn ishpeımin. Ózińiz kórip turǵandaı, qoqys, ári aşylaý dámi bar. Sýyn kir jýýǵa alamyn, ótken-ketken kólikter toqtap, basqa sý alatyn jer bolmaǵasyn iship jatady, - deıdi Marııa Svejak.

Týǵannan osy eldi mekende turyp jatqan Marııa ájeıdiń aıtýynsha, munda ortalyqtandyrylǵan sý jelisi múlde bolmaǵan. Al úıiniń qasyndaǵy qudyq 1973 jyly qazylǵan eken. 1989 jyly qudyqtyń bórenelerin aýystyryp, jóndegen.

- Polshadan delegatsııa keletin bolǵandyqtan qudyqtardy retke keltirdi. Sodan beri tur. Endi eshkimge keregi joq. Kóktemnen bastap sýdy satyp alyp ishemin. 5 lıtrlik bótelke 700 teńge turady, - deıdi zeınetker.

Aýyl turǵyndarynyń aıtýynsha, byltyr joǵarydan tapsyrma túsip, ortalyq kóshedegi eski qudyqtyń ústine fıltr qoıǵan. Biraq ol uzaqqa barmaı isten shyqqan.

- Úsh aı ǵana taza sý ishtik. Ol qysta boldy. Bitti. Súzgileri laıǵa toldy, ıe joq. Іsteıtin aqsha joq. Ákim «men eshteńe isteı almaımyn» deıdi. Kelispek boldy, biraq, qazir aqshasyz eshkim eshteńe istemeıdi ǵoı. Osyndaı 3-4 qudyq bar, jurt amalsyzdan sodan sýdy alady. Onyń sapasyn tekserip jatqan da eshkim joq. Sońǵy ret sekseninshi jyldary SES teksergen shyǵar, - deıdi Marııa Svejak.

Ozernoe eldi mekeniniń turǵyny Leontına Korchınskaıanyń aıtýynsha, jaqynda Ozernoe aýylynyń 90 jyldyq mereıtoıy atalyp ótken.

- Aýyldyń 90 jyldyǵyna oraı qaıta jónge keltire me dep kútip edik, bolmady. Basynda eski qudyqqa úıshik qoıyp, fıltr ornatty. Biraq eski qudyqtyń sýy az boldy, fıltr qum-laıǵa tolyp qala berdi. Osylaısha eki aı ǵana jumys istedi. Aýyl jınalysynda biz 25-30 metrlik uńǵyma ornatýdy suradyq, taza sý ishý úshin. Ony byltyr kúzde iske qosty. Sýy jumsaq, tap-taza edi, biraq, endi ol jumys istemeı jabyq tur. Bizge rezeńkeleri sýyqtan úzilgen dedi, al ony aýystyrýǵa eshkim asyqpaıdy. Biz, tipti úıdi sýǵa kirgizý týraly aıtpaımyz da, - deıdi Leontına Korchınskaıa.

Aýyl ákimi Talǵat Jomartovtyń aıtýynsha, Ozernoe eldi mekenin ortalyqtandyrylǵan sý berý jelisine qosý máselesi qazirgi ýaqytta QR Sý resýrstary jáne ırrıgatsııa mınıstrliginde qaralyp jatyr. Jobalyq-smetalyq qujat 1,5-2 jyl jasalmaq.

- Kellerovka aımaǵyn sapaly aýyz sýmen qamtý jobasy 3-4 jylǵa shaqtalǵan. Oǵan deıin keshendi blok modýlder qoıyp jatyr. Maǵan qaraıtyn Krasnaıa Polıana aýyldyq okrýginde osynda 6 KBM bar. Ozernyıdaǵy KBM istemeı turǵan, búgin keshke baryp iske qosamyz. Merdigerlerdi shaqyrdyq. Aýdandyq bıýdjetten bólindi, naqty qansha soma ekenin aıta almaımyn, shamamen 6-8 mln teńge shyǵar, - deıdi Krasnaı Polıana aýyldyq okrýginiń ákimi Talǵat Jomartov.

Buǵan deıin SQO-daǵy Kóbensaı aýylynda taza sý máselesi týraly jazǵan edik.