SQO-da qazaq jazýshylarynyń mereıtoıy atalyp ótti
Petropavl qalasynda ótken «Ultyn súıgen ulylar» atty respýblıkalyq ǵylymı-praktıkalyq konferentsııa men respýblıkalyq aqyndar aıtysy belgili qazaq jazýshylary - Ǵabıt Músirepovtiń 120 jyldyǵyna, Safýan Sháımerdenovtiń 100 jyldyǵyna jáne Kákimbek Salyqovtyń 90 jyldyǵyna arnaldy.
Konferentsııaǵa SQO ákiminiń orynbasary Ǵanı Nyǵymetov, Qazaqstan Jazýshylar odaǵy tóraǵasynyń birinshi orynbasary Aqberen Elgezek, Jazýshylar odaǵynyń múshesi Ǵalym Jaılybaı jáne t.b. ıgi jaqsylar qatysty.
Konferentsııa barysynda óńirdiń jas aqyndarynyń 3 kitabynyń, sondaı-aq SQO jazýshylary antologııasynyń tusaýkeseri ótti.
Іs-shara sońynda Aqberen Elgezek óńirdiń jas qalamgerleri - Amanjol Zaǵypar, Qulaıhan Rahmet, Nurgúl Oqashevaǵa kýálikter tapsyrdy jáne olardyń QR Jazýshylar odaǵynyń quramyna qabyldanǵandaryn jarııalady.
16 naýryz kúni Aqan seri atyndaǵy oblystyq fılarmonııada respýblıkalyq aqyndar aıtysy ótti.
Aıtysty Qazaqstannyń eńbek sińirgen qaıratkeri, «Parasat» jáne «Qurmet» ordenderiniń ıegeri, aıtys aqyndary men jyrshy-termeshiler halyqaralyq odaǵynyń tóraǵasy Júrsin Erman júrgizdi.
Jyr-dodaǵa respýblıkanyń túkpir-túkpirinen 12 aıtysker aqyn qatysty.
Qazylar alqasynyń quramyna Qazaqstannyń eńbek sińirgen qaıratkeri, halyqaralyq «Alash» ádebı syılyǵynyń laýreaty Ǵalym Jaılybaı tóraǵalyq etti.
Sondaı-aq, qazylar alqasynyń quramynda belgili aqyn, Qazaqstan Jazýshylar Odaǵy tóraǵasynyń birinshi orynbasary Aqberen Elgezek, aıtysker aqyn Dáýletkereı Kápuly, Baýyrjan Halıolla jáne basqalar boldy.
Aıtysta bas júldeni Qyzyljar óńiriniń namysyn qorǵaǵan aqyn Jarqyn Juparhan jeńip aldy.
1-oryn Nur-Sultannan kelgen Erkebulan Qaınazarǵa buıyrdy.
Aıta ketý kerek, Jarqyn Juparhan - respýblıkalyq aıtystyń bas júldesin jeńip alǵan alǵashqy soltústikqazaqstandyq.
