SQO-da qaza tapqan polıtseıler men áskerılerdi eske alýǵa arnalǵan voleıboldan týrnır ótýde

PETROPAVL. QazAqparat – Petropavlda voleıboldan bıylǵy qańtar oqıǵasy kezinde qyzmettik mindetterin atqarý barysynda qaza tapqan polıtseıler men áskerı qyzmetshilerdi eske alýǵa arnalǵan týrnır ótip jatyr, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, polıtsııa qyzmetkerleri arasynda ótip jatqan týrnır úsh kúnge jalǵasady. Jarys Petropavldaǵy «Dınamo» dene shynyqtyrý-sport qoǵamynyń oblystyq fılıalynyń bazasynda uıymdastyrylǵan.

Qaza tapqan polıtseıler men áskerı qyzmetshilerdi eske alý týrnıri Qazaqstannyń barlyq óńirlerinde ótkizilip jatyr. SQO-da is-sharaǵa oblystyq polıtsııa vedomstvosynyń basqarmalary men bólimderinen 100-den asa pogondaǵy sportshy qatysty.

Týrnırdi ashqan oblystyq polıtsııa departamentiniń bastyǵy Aıdyn Qabduldınovtyń aıtýynsha, qańtar aıynda tártipti qamtamasyz etken polıtseıler men áskerı qyzmetshiler erlik kórsetip, eń qymbat – ómirlerin aıamady. Óziniń kásibı boryshyna adal bolý, dástúrlerdi saqtaý jáne jalǵastyrý jas quqyqtyq tártip saqshylaryn tárbıeleýdiń negizi.

«Voleıbol – kúsh pen tózimdilikti talap etetin oıyn ǵana emes, komandada áreket ete otyra, nátıjege qol jetkizýdi úıretedi. Týrnırge qatysyp jatqan 13 komandanyń ishindegi sportshylardan úzdikti anyqtaý qajet», - deıdi SQO polıtsııa departamenti arnaıy jáne jumyldyrý daıarlyǵy basqarmasynyń bastyǵy Janat Saǵdenov.

Jarystyń aqtyq syny 26 naýryz bolady. Eske alý týrnıriniń jeńimpazdary qundy syılyqtar jáne kýboktarmen marapattalady.