SQO-da qaıtarylǵan aktıvter qarajatynan aýrýhanany jóndeýge 1,3 mlrd teńge bólindi
ASTANA. KAZINFORM – Prezıdenttiń áleýmettik ınfraqurylymdy damytý jónindegi tapsyrmalary sheńberinde Úkimet medıtsınalyq ınfraqurylymdy jańǵyrtý jumystaryn júrgizip jatyr. Sonyń ishinde elge qaıtarylǵan zańsyz shyǵarylǵan aktıvter esebinen júzege asyp jatqan jobalar da bar. Soltústik Qazaqstan oblysynyń Taıynsha kópsalaly aýdanaralyq aýrýhanasyn kúrdeli jóndeýdi aıaqtaýǵa Arnaýly memlekettik qordan 1,3 mlrd teńge bólindi. Bul týraly Úkimettiń baspasóz qyzmeti habarlady.
Qazirgi ýaqytta tehnıkalyq bazany jáne ınjenerlik jelilerdi jańǵyrtý jumystary júrgizilip jatyr. Onyń aıasynda zertteýlerdi tikeleı aýdan ortalyǵynda júrgizý úshin MRT apparatyna jáne zamanaýı klınıkalyq-dıagnostıkalyq zerthanaǵa arnalǵan mamandandyrylǵan úı-jaılar ashý qarastyrylyp otyr.
Sonymen qatar halyqaralyq trıaj júıesi boıynsha qabyldaý bólmesi uıymdastyrylmaq. Jobaǵa sáıkes onda personaldyń jedel monıtorıng júrgizý úshin kedergisiz kirý múmkindigi bar reanımatsııalyq tósekter ornalastyrylatyn bolady. Bul medıtsınalyq aralasýdyń jedeldigin jáne medıtsınalyq qyzmetterdiń joǵary sapasyn qamtamasyz etedi.
Jalpy alǵanda, jobany júzege asyrý nátıjesinde medıtsınalyq mekeme shuǵyl jáne josparly kómek kórsetýdiń zamanaýı standarttaryna sáıkes keltirilmek.
QR Qarjy mınıstrliginiń derekterine sáıkes, Arnaýly memlekettik qordan 400-den astam áleýmettik jáne kommýnaldyq nysandarǵa, onyń ishinde 183 medıtsınalyq mekemege qatysty jobalardy júzege asyrýǵa 482 mlrd teńge bólingen. Birqatar joba «Aýyldyq densaýlyq saqtaý salasyn jańǵyrtý» baǵdarlamasy aıasynda qamtylǵan. Máselen, alǵashqy medıtsınalyq-sanıtarlyq kómek nysandaryn, kópsalaly aýrýhanalardy, mamandandyrylǵan medıtsınalyq ortalyqtardy, shuǵyl medıtsınalyq kómek ınfraqurylymdaryn salý jáne jańartý jumystary júrgizilip jatyr.
Aıta keteıik, BQO-da qaıtarylǵan aktıvter esebinen sýmen qamtý nysandary salyndy.
Pavlodar áýejaıy qaıtarylǵan aktıvter esebinen rekonstrýktsııalanady.