SQO-da qaıtarylǵan aktıvter qarajatyna jańa sý qubyry tartyldy

ASTANA. KAZINFORM — Soltústik Qazaqstan oblysynyń ákimi Ǵaýez Nurmuhambetov ınfraqurylymdy jańǵyrtý jumystaryn baıandady.

Bıyl Taıynsha qalasynda uzyndyǵy 4,5 shaqyrym bolatyn jylý jelisin jańǵyrtý jumystary aıaqtalyp qaldy, bul jobanyń quny — 730 mln teńge. 

— Oblysta 76 shaqyrym elektr jabdyqtaý jelileri aýystyrylyp, 13 mlrd teńgege 3 qosalqy stantsııa qaıta jańǵyrtyldy. Petropavl qalasyndaǵy jalpy quny 11 mlrd teńge bolatyn, uzyndyǵy 8,1 shaqyrym eki jylý jelisi boıynsha jumystar josparlanyp otyr. Jalpy 2029 jylǵa deıin 7 myń shaqyrymnan astam ınjenerlik jeliler jańǵyrtylady, — dedi Ǵ. Nurmuhambetov elordada Ortalyq kommýnıkatsııalar qyzmetinde. 

Jylytý maýsymyna daıyndyq aıasynda 1,5 myń shaqyrym elektr jelisi, 13 shaqyrym jylý jelisi jáne 5 shaqyrym sý qubyry jóndeldi. Petropavl JEO-2-niń №1 tútin murjasy salyndy.

— Bıyl óńirde sý qubyry júıesin damytýǵa rekordtyq 74 mlrd teńge baǵyttaldy. Bul kórsetkish ótken úsh jyldyq kezeńmen salystyrǵanda 2 eseden astam kóp. Aıta ketý kerek, onyń 45 mlrd teńgesi qaıtarylǵan aktıvter esebinen jumsaldy, — dep tolyqtyrdy oblys ákimi. 

Buǵan deıin Ǵ. Nurmuhambetov Soltústik Qazaqstanda rekordtyq 6,5 mln tonna astyq jınalǵanyn aıtqan edi.

Sondaı-aq, Soltústik Qazaqstan oblysy 900 mlrd teńgege jýyq ınvestıtsııa tartty.