SQO-da qaıtarylǵan aktıvter esebinen jańa sýmen jabdyqtaý júıesi iske qosyldy
PETROPAVL. KAZINFORM – Soltústik Qazaqstan oblysynyń Aıyrtaý aýdany Baıantaı aýylynda jańa sýmen jabdyqtaý júıesi iske qosyldy. Joba prokýratýra organdary arqyly memleketke qaıtarylǵan aktıvter esebinen qarjylandyryldy. Bul týraly Qazaqstan Bas prokýratýrasynyń baspasóz qyzmeti habarlady.
Saltanatty is-sharaǵa Aıyrtaý aýdanynyń prokýrory m.a. Zeınýllın Jeńis, aýdan ákimi Meńdibaev Meıram, sondaı-aq aýyl turǵyndary qatysty.
Jańa júıe 240 turǵynǵa ortalyqtandyrylǵan aýyz sý berýdi qamtamasyz etedi. Bul eldi meken turǵyndarynyń turmys sapasyn arttyrýǵa baǵyttalǵan.
Joba memleketke qaıtarylǵan qarajattyń áleýmettik mańyzy bar nysandardy qarjylandyrýda tıimdi paıdalanylǵanyn kórsetedi. Soltústik Qazaqstan oblysynda qaıtarylǵan aktıvterdi paıdalanyp, densaýlyq saqtaý jáne kommýnaldyq sharýashylyq salalarynda barlyǵy 32 áleýmettik joba júzege asyrylyp jatyr.
Osy jobalardyń oryndalýy qadaǵalaý organynyń baqylaýyna alynǵan.
Budan buryn SQO-da qaıtarylǵan aktıvter qarajatynan aýrýhanany jóndeýge 1,3 mlrd teńge bólingenin jazǵanbyz.
