SQO-da qaıtarylǵan aktıvter esebinen sýmen jabdyqtaý nysandary iske qosyldy
ASTANA. KAZINFORM — Óńirdegi Býlaev, Aqjar jáne Taıynsha aýdandarynda sý jelileri jańartyldy. Sonyń arqasynda 22 myńnan astam aýyl turǵyny taza aýyz sýǵa qol jetkize alady.
Soltústik Qazaqstan oblysy prokýratýrasynyń deregine sáıkes Memleket basshysynyń halyqty sapaly aýyz sýmen qamtamasyz etý jónindegi tapsyrmasyn oryndaý aıasynda prokýratýra organdary qaıtarǵan qarajat esebinen sýmen jabdyqtaý salasynda óńirde birqatar aýqymdy jobalar júzege asyrylyp jatyr.
Qazirgi ýaqytta Býlaev toptyq sý qubyryn qaıta qurý, Aqjar jáne Taıynsha aýdandarynyń eldi mekenderine sý jelilerin salý aıaqtaldy. Salynǵan qubyrlardyń jalpy uzyndyǵy 290 shaqyrymnan asady.
— Kókshetaý toptyq sý qubyryna jalǵasatyn Shal aqyn jáne Aıyrtaý aýdandarynyń 24 aýylyn aýyz sýmen qamtamasyz etetin sý qubyrynyń qurylysy aıaqtalyp qaldy. Bul jobalardy júzege asyrý qadaǵalaý organynyń baqylaýynda. Atqarylǵan jumystardyń arqasynda 22 myńnan astam aýyl turǵyny taza aýyz sýǵa qol jetkize alady, bul oblys turǵyndarynyń ómir súrý sapasyn aıtarlyqtaı jaqsartady, — delingen habarlamada.
Oblys prokýratýrasy memleketke qaıtarylǵan aktıvter esebinen qarjylandyrylatyn áleýmettik jobalardyń oryndalý barysyn baqylaýdy jalǵastyrady.
Buǵan deıin Balqash áýejaıyn rekonstrýktsııalaýǵa qaıtarylǵan aktıvter esebinen 945 mln teńge bólingeni belgili boldy.