SQO-da qaıtarylǵan aktıvter esebinen bes áleýmettik joba júzege asyp jatyr
PETROPAVL. KAZINFORM — Soltústik Qazaqstan oblysynda densaýlyq saqtaý jáne kommýnaldyq sharýashylyq salalarynda, sondaı-aq áleýmettik jáne ekonomıkalyq ınfraqurylymdy damytýǵa baǵyttalǵan 5 joba júzege asyrylyp jatyr.
SQO prokýratýrasynyń málimetinshe, bul jobalardyń barlyǵy memleketke qaıtarylǵan aktıvter esebinen qarjylandyrylǵan. Áleýmettik bastamalardyń iske asyrylýyn júıeli túrde baqylaýda ustap otyr.
Máselen, Taıynsha aýdanynda kópbeıindi aýdanaralyq aýrýhananyń qabyldaý bólimi qaıta jańǵyrtylyp, ǵımarattyń birinshi qabatyna kúrdeli jóndeý júrgizilip jatyr. Joba nátıjesinde medıtsınalyq mekeme oblys turǵyndaryna shuǵyl jáne josparly medıtsınalyq kómek kórsetýdiń zamanaýı standarttaryna sáıkes qyzmet kórsetetin bolady.
Petropavlda «Qyzyljar» arnaıy ekonomıkalyq aımaǵynyń ınjenerlik ınfraqurylymynyń qurylysy bastalǵan. Bul óz kezeginde ınvestıtsııa tartýǵa, óndiristik áleýetti arttyrýǵa jáne jańa jumys oryndaryn ashýǵa múmkindik beredi.
Budan bólek, Presnov jáne Sokolov toptyq sý qubyrlaryn qaıta qalpyna keltirý jumystary qolǵa alynǵan. Nátıjesinde 20 myńnan astam oblys turǵyny sapaly aýyz sýmen qamtamasyz etiledi. Bul sanıtarlyq-epıdemıologııalyq qaýipsizdik deńgeıin arttyryp, aýyldyq eldi mekenderdegi ómir súrý deńgeıin jaqsartýǵa yqpal etedi.
Jalpy, óńirde qaıtarylǵan aktıvter esebinen bilim berý jáne kommýnaldyq sharýashylyq salalarynda 34 áleýmettik joba iske asyrylǵan.
Al memleketke qaıtarylǵan aktıvter qarajatynyń tıimdi ári maqsatty jumsalýyna prokýratýra monıtorıng júrgizip, baqylaýda ustamaq.
Buǵan deıin Almaty oblysynda qaıtarylǵan aktıvter esebinen 1,1 mlrd teńgege sport kesheni salynatynyn jazǵan edik.