SQO-da qaıtarylǵan aktıvter esebinen balabaqsha salyndy
ASTANA. KAZINFORM — Sáýir aıynda Petropavl qalasynda prokýratýra organdary memleketke qaıtarǵan aktıvter esebinen salynǵan «Jas-órken» bóbekjaı-baqshasyna balalardy qabyldaý bastaldy.
Prokýratýra organdary memleketke qaıtarylǵan aktıvter esebinen qarjylandyrylatyn áleýmettik bastamalardyń iske asyrylýyn baqylaý boıynsha júıeli jumysty jalǵastyrýda.
Sáýir aıynda Petropavl qalasynda prokýratýra organdary memleketke qaıtarǵan aktıvter esebinen salynǵan «Jas-órken» bóbekjaı-baqshasyna balalardy qabyldaý bastaldy.
Jobalyq qýatyna sáıkes bóbekjaı-baqshada 12 top qarastyrylǵan, jalpy syıymdylyǵy – 280 oryn.
Búgingi tańda mektepke deıingi uıymda 232 bala tárbıelenýde, balalardy qabyldaý jalǵasýda.
Balabaqshanyń paıdalanýǵa berilýiniń nátıjesinde shamamen 300 oryn tapshylyǵy qysqartylyp, bul «Jas-órken» shaǵyn aýdanynyń turǵyndary men Soltústik Qazaqstan oblysyndaǵy bala quqyqtary jónindegi ýákildiń ókili tarapynan oń baǵalandy.
Sonymen qatar, oblys aýmaǵynda densaýlyq saqtaý jáne kommýnaldyq sharýashylyq salalarynda halyqtyń ómir súrý sapasyn arttyrýǵa, sondaı-aq áleýmettik jáne ekonomıkalyq ınfraqurylymdy damytýǵa baǵyttalǵan taǵy 4 nysannyń qurylysy jalǵasýda.
Qurylys jumystarynyń barysy oblystyń qadaǵalaý organynyń turaqty baqylaýynda.
Oblys prokýratýrasy memleketke qaıtarylǵan aktıvter esebinen qarjylandyrylatyn áleýmettik jobalardyń iske asyrylýyna monıtorıng júrgizýdi jalǵastyrady.
