SQO-da qaı salada eń kóp qarjylyq zań buzýshylyqtarǵa jol beriledi
PETROPAVL. KAZINFORM — Soltústik Qazaqstan oblysynda byltyr 58 aýdıtorlyq tekserý júrgizilip, nátıjesinde jalpy somasy 192,8 mlrd teńgege zań buzýshylyqtar anyqtaldy.
SQO boıynsha ishki memlekettik aýdıt departamentiniń málimetinshe, qarjylyq zań buzýshylyqtardyń úlesi — 7,8 mlrd teńge.
— Qurylys, turǵyn úı-kommýnaldyq sharýashylyq jáne jolaýshylar kóligi salalarynda eń kóp qarjylyq zań buzýshylyqtarǵa jol beriledi. Kóbinese oryndalmaǵan jumystarǵa aqy tóleý, sondaı-aq tehnıkalyq talaptarǵa sáıkes kelmeıtin taýarlardy satyp alý faktileri anyqtaldy, — deıdi departamenttiń bólim basshysy Aıgúl Shırajıeva.
Qabyldanǵan sharalardan keıin 7,8 mlrd teńge aqshalaı tóleý, jumystardy oryndaý jáne qyzmet kórsetý jolymen joıyldy. Sonymen qatar, zań buzýshylyqtarǵa jol bergen 64 laýazymdy tulǵa tártiptik jaýapkershilikke tartyldy.
Zańnamaǵa sáıkes departament 658 ákimshilik is qozǵap, jalpy somasy 65,6 mln teńge bolatyn aıyppul saldy. Budan bólek, departament bilim, densaýlyq saqtaý, mádenıet, týrızm jáne sport salasyndaǵy eńbekaqy tólemderine monıtorıng júrgizdi. Monıtorıng barysynda jeke tulǵalardyń banktik shottaryna jalaqy, demalys jáne saýyqtyrý járdemaqylary, sondaı-aq 23 mln teńge syıaqylar túrinde bıýdjet qarajatynyń artyq aýdarymdary anyqtalyp, ol tolyq qaıtaryldy.
— Aýdıtorlyq tekserýler barysynda bıýdjet qarajatyn urlaý faktileri de anyqtaldy. Mysaly, Maǵjan Jumabaev aýdanynyń Jastar resýrstyq ortalyǵynyń býhgalteri 19 mln teńge qarajatty jymqyrǵan. Quqyq qorǵaý organdaryna aýdıt materıaldary berildi. Sot úkimimen býhgalter kináli dep tanylyp, zalaldyń bir bóligi bıýdjetke qaıtaryldy jáne ol jeti jylǵa bas bostandyǵynan aıyryldy, — deıdi Aıgúl Shırajıeva.
Búginde departament zańbuzýshylyqtardyń edáýir bóligin memlekettik aqparattyq júıelerdiń derekterin taldaý negizinde nysandarǵa barmaı-aq anyqtaıdy, bul tekseriletindermen baılanysty azaıtýǵa jáne aýdıtorlyq sheshimder men tujyrymdardyń obektıvtiligin arttyrýǵa múmkindik beredi. Osylaısha, ishki memlekettik aýdıt dálirek, tehnologııalyq jáne qoǵamdyq múddelerdi qorǵaýǵa jáne bıýdjet qarajatyn maqsatty paıdalanýǵa baǵyttalǵan.
Buǵan deıin Prezıdent Qasym-Jomart Toqaev densaýlyq saqtaý men bilimge bólingen qarajatty jymqyrǵandardy zań turǵysynan jaýapqa tartýy qajettigin aıtqan edi.