SQO-da qaýipti jol ýchaskeleriniń kartasy jasaldy

PETROPAVL. QazAqparat – Soltústik Qazaqstan oblysynyń avtojoldarynda qaýipti 14 ýchaske bar. Ony polıtseıler jasaǵan apattyq-qaýipti ýchastkelerdiń kartasynan kórýge bolady, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, óńir polıtseıler apattylyqty baǵalaý jáne taldaý nátıjeleri boıynsha avtojoldardyń 14 qaýipti ýchaskesi kórsetilgen karta jasady.

Osylaısha SQO-da «Chelıabi-Novosibir» tasjolynyń 465-ten 655 km-ge deıingi bóligi óte qaýipti sanalady. Munda jyl basynan 13 jol-kólik oqıǵasy bolyp, 3 adam kóz jumdy, 29 adam jaraqat aldy. Jol-kólik oqıǵalarynyń kópshiligi jyldamdyq rejımin asyrýdan, ara qashyqtyqtyń saqtalmaýynan, júrgizýshilerdiń sharshaýy saldarynan bolǵan.

Jergilikti polıtsııa qyzmeti basqarmasy basshylyǵynyń aıtýynsha, eńbek demalysy kezeńiniń bastalýyna oraı qala syrtyndaǵy joldarda kólik legi arta túsken. Adamdar otbasylarymen alys jolǵa shyǵyp, basqa qalalarǵa, memleketterge barady. Keıbiri birneshe kólik bolyp jınalyp, sapar shegedi.

«Kólik tizginine sharshap nemese uıqy qanbaǵan kúıde otyrýǵa bolmaıdy. Sondaı-aq júrgizýshiler ornatylǵan jol belgilerine nazar aýdarýy, belgilengen jyldamdyqty asyrmaýy jáne araqashyqtyqty saqtaýy tıis. Jaryq shamdarynyń jumysyn qarap otyrýdy umytpańyz. Táýliktiń qarańǵy kezinde jáne jańbyr jaýǵanda jol qozǵalysynyń basqa qatysýshylaryna birden kórinesiz. Jolǵa shyǵarda avtokóliktiń tehnıkalyq jaǵdaıyn tekserip, jolaýshylardyń qaýipsizdigin qamtamasyz etý qajet. Qaýipsizdik beldigi men arnaıy balalar oryndyǵyn paıdalaný kerek», - deıdi SQO PD Jergilikti polıtsııa qyzmeti basqarmasy bastyǵynyń mindetin atqarýshy Aleksandr Rozbah.

Jyl basynan respýblıkalyq mańyzdaǵy avtojoldarda 39 jol-kólik oqıǵasy tirkelip, saldarynan 11 adam qaza tapty, 83 adam túrli jaraqattar aldy.