SQO-da qaýipti indet belgilerimen aýrýhanaǵa jatqyzylǵandar sany bir aptada 32% artty
PETROPAVL. QazAqparat – Soltústik Qazaqstan oblysynda koronavırýsty ınfektsııadan aýrýhanada emdelip jatqan 97 adamnyń úsheýiniń jaǵdaıy aýyr, olar ókpeni jasandy jeldetý apparatyna qosylǵan, dep habarlaıdy QazAqparat tilshisi.
SQO Taýarlar men kórsetiletin qyzmetterdiń sapasyn baqylaý departamentiniń basshysy Serikbaı Qasmaqasov onlaın brıfıng ótkizip, COVID-19 qatysty óńirdegi jaǵdaımen tanystyrdy.
Oblystyń bas sanıtarııalyq dárigeriniń málimetinshe, SQO-da qaýipti indetti juqtyrýdyń 315 jaǵdaıy tirkelse, sonyń 146-synda naýqastar dárigerge aýyrǵan soń qaralǵan. 169-ynda aýrý belgileri baıqalmasa, 111 jaǵdaıda syrqattar syrttan keldi. Sondaı-aq 38 balanyń vırýsty juqtyrǵany rastaldy.
Óńirde tek sońǵy táýlikte COVID-19 24 adamda anyqtalsa, onyń teń jartysynda koronavırýs ınfektsııasynyń aýrý belgileri bolǵan.
«Qazirgi tańda statsıonarlarda 97 adam em alyp jatyr. Olardyń 68-iniń jaǵdaıy qanaǵattanarlyq bolsa, 26-synyń jaǵdaıy – ortasha, úsheýi aýyr halde jatyr. Ózdiginen dem ala almaǵandyqtan bul naýqastar ókpeni jasandy jeldetý apparatyna qosylǵan. Budan basqa 157 adam úıden baqylanady. Táýir bolyp shyqqandardyń sany 61-den asty», - deıdi Serikbaı Qasmaqasov.
SQO-da qaýipti indet Jambyl aýdanyn eseptemegende Petropavl qalasy men óńirdiń 12 aýdanynda tirkeldi. Aýyrǵandardyń 56% oblys ortalyǵyna tıesili bolsa, ekinshi-úshinshi oryndarda M.Jumabaev jáne Mamlıýt aýdandary keledi. Bul aýdandarda aýrý negizinen syrttan kelgenderden anyqtaldy.
