SQO-da qaýipti indet anyqtalǵan 3 er adam Reseıde jumys istegen
PETROPAVL. QazAqparat – Soltústik Qazaqstan oblysynda koronavırýs anyqtalǵan úsh adam da Reseıde vahtalyq ádispen jumys istegen, dep habarlaıdy QazAqparat tilshisi.
Shuǵyl shtabtyń málimetinshe, COVID-19 juqtyrǵandardar 1990, 1993, 1996 jyly týǵan er adamdar. Olar Reseıdiń Omby qalasynda vahtalyq ádispen jumys isteıdi. Shekaradan M. Jumabaev aýdanynyń "Qaraqoǵa" beketi arqyly ótti. Elge kelgen soń COVID-19-ǵa tekserilip, karantındik statsıonarǵa jatqyzyldy.
Zerthanalyq zertteý olardyń qaýipti indetti juqtyrǵanyn kórsetti. Qazir naýqastar Petropavldaǵy birinshi qalalyq aýrýhananyń juqpaly aýrýlar bóliminde em alyp jatyr. Bul azamattarmen baılanysta bolǵan 4 adam tekserildi, nátıjeleri teris. Epıdemıologııalyq tergeý jumystary jalǵasýda.
Jalpy 3 maýsymdaǵy jaǵdaı boıynsha SQO aýmaǵynda COVID-19 vırýsyn juqtyrǵan 64 adam tirkelgen.
