SQO-da «Qaýipsiz jol» sharasy ótti
PETROPAVL. QazAqparat – Soltústik Qazaqstan oblysynda «Qaýipsiz jol» jedel-profılaktıkalyq is-sharasy aıasynda 2 myńnan astam túrli quqyq buzýshylyq anyqtaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 4 kún boıy tártip saqshylary jol qozǵalysyna qatysýshylardyń jolda júrý erejelerin saqtaýyn kúsheıtilgen túrde qadaǵalady.
Quqyq buzýshylyqtardyń basym bóligi – qaýipsizdik belbeýin taqpaýǵa qatysty, olardyń sany – 435. Sondaı-aq, 256 júrgizýshi avtokólikti júrgizý kezinde uıaly telefon qoldanǵan.
«Ókinishke oraı, kóptegen júrgizýshiler ózine qolaıly bolýy úshin jolda júrý erejelerin eskermeıdi. Alaıda jol apaty bolǵan kezde júrgizýshige joldaǵy jaǵdaıdan alańdatqan telefondaǵy áńgime de, qaýipsizdik beldigin taqpaı ózine senimdi bolýy da mańyzdy bolmaıdy. Zańnyń ár normasy jolda qaıǵyly jaǵdaıdy barynsha azaıtýǵa baǵyttalǵanyn este saqtaǵan jón», - deıdi bul jóninde SQO PD bastyǵynyń birinshi orynbasary Qanat Aıtbaev.
13 avtomobıl ıesi kólik quralyn zańsyz qaıta jabdyqtaǵany úshin jaýapqa tartyldy, onyń tórteýi – talapqa sáıkes kelmeıtin ksenon shamdaryn ornatqan. Polıtseılerdiń aıtýynsha, kólikke taqqan arzan shamdar qarsy baǵyttaǵy júrgizýshiniń kózin shaǵylystyratynyn eskertedi. Durysy sertıfıkattalǵan taýardy tańdap, kólikti qaıta jabdyqtaýdy zańmen belgilengen tártipte júrgizgen jón.
Kólik júrgizýshileri jibergen óreskel quqyq buzýshylyqtyń eń kóbi – baǵdarshamnyń tyıym salatyn sıgnalyna ótý, manevr jasaýǵa qatysty. Budan basqa júrgizýshiler kóshe qıylystary men ótkelderde jaıaý júrginshilerge jol bermegen. Al kólikti basqarý quqyǵynan aıyrylǵan 32 júrgizýshi soǵan qaramastan qaıta mas kúıde rólge otyrǵan.
Polıtseıler barlyǵy jedel-profılaktıkalyq is-shara barysynda 2 myńnan astam túrli quqyq buzýshylyqty anyqtady.
