SQO-da káýapqa arnalǵan etten antıbıotık tabyldy

NUR-SULTAN. QazAqparat – Soltústik Qazaqstan oblysynda káýapqa arnalǵan ettiń quramynan antıbıotıkter tabyldy, dep habarlaıdy QazAqparat QRDSM Taýarlar men qyzmetter qaýipsizdigi jáne sapasyn baqylaý komıtetine silteme jasap.

«Soltústik Qazaqstan oblysynyń Aqjar aýdany Lenıngradskoe aýylyndaǵy «Zamojskaıa S.A» jeke kásipkerligine qarasty «Aqkól» dúkenindegi azyq-túlikterdiń qaýipsizdigin tekserý barysynda tońazytylǵan «Kavkazskıı» káýapqa arnalǵan et óniminen adam aǵzasyna qaýipti antıbıotıkter tabyldy. Súıeksiz, usaqtap kesilgen, jartylaı daıyndalǵan et ónimi Reseıdiń Omby oblysy, Kalachınskıı qalasyndaǵy «Omskıı bekon» AQ-nyń ónimi. Onyń quramynan 0,22 mıllıgramm kóleminde levomıtsetın tabyldy. Normalyq kórsetkishke saı levomıtsetın 0,01 mıllıgrammnan aspaýy tıis. Ónimdi jetkizýshi Aqmola oblysy, Kókshetaý qalasyndaǵy «N.V BUSINESS GROUP» jeke kásipkerligi» , - delingen habarlamada.

Komıtet taratqan aqparatta aıtylǵandaı, QR Aýyl sharýashylyǵy mınıstrligi, Veterenarııalyq baqylaý jáne qadaǵalaý komıtetine tasymaldaýshy mekemeniń talapqa saı kelmeıtin ónimine qatysty veterenarlyq-sanıtarlyq tekserý ótkizý jóninde hat joldandy.

«Sarapshy mamandar tutynýshylardan et ónimderin alar kezde onyń jaramdylyq merzimin qaraý kerektigin jáne múmkindiginshe jeke sharýashylyqtardan satyp alý qajettigin eskertedi. Antıbıotıkter adamnyń ómirlik mańyzy bar aǵzalaryna keri áserin tıgizedi. Ásirese búırek, baýyr, júrek qan tamyrlary jáne júıke júıelerine zııandy. Sondyqtanda etti aldymen qaınatyp sosyn buqtyrǵan jón. Al taýyq eti bolsa, aldymen bir qaınatyp, onyń sýyn tógip tastaýdy usynady», - dep habarlaıdy komıtet.