SQO-da qatty ystyqqa baılanysty eskertý jarııalandy
PETROPAVL. QazAqparat – Soltústik Qazaqstan oblysynda sınoptıkterdiń boljamynsha, aldaǵy kúnderi 33 gradýsqa deıin ystyq bolady. Osyǵan baılanysty 112 qyzmeti sms-habarlama arqyly eskertý jarııalady, dep habarlaıdy QazAqparat tilshisi.
«Qazgıdromet» RMK SQO fılıalynyń málimetinshe, aldaǵy kúnderi óńirdiń aýa raıyna soltústik-shyǵys tsıklonynyń jyrasy áser etedi. 15 mamyr kúni oblysta azdaǵan jańbyr jaýyp, naızaǵaı oınaıdy. Túnde jáne tańerteń tuman túspek. Kúndiz sekýndyna 15-20 metrge deıin jel turyp, aýa temperatýrasy 27-32 gradýsqa deıin kóteriledi.
«16 mamyrda oblys boıynsha keı jerlerde azdaǵan jańbyr jaýyp, kún kúrkireıdi. Ońtústik batystan jel soǵady, kúshi 9-14 m/s. Aýa temperatýrasy túnde 10-15, kúndiz 25-30, oblystyń ońtústiginde 33 gradýsqa deıin ysıdy», - deıdi «Qazgıdromet» RMK SQOF bólim jetekshisi Gúlzat Ǵazızova.
33 gradýs ystyq 17 mamyr kúni de saqtalmaqshy. Osyǵan baılanysty 112 qyzmeti 15-17 mamyr kúnderine eskertý jarııalady.
«Kúnniń qatty ysýyna baılanysty órt shyǵý qaýpi arta túsedi. SQO
tótenshe jaǵdaılar departamenti ormanǵa barǵan jaǵdaıda órt qaýipsizdigi erejesin qatań saqtaýǵa keńes beredi. Tótenshe jaǵdaı týyndaıtyn bolsa táýlik boıy jumys isteıtin 112 telefon nómirine habarlasýǵa bolatynyn eske salamyz», - delingen SQO TJD-niń habarlamasynda.
