SQO-da qatty boranda kishkene inisin arqalap júrip qutqarǵan jigit marapattaldy
PETROPAVL. QazAqparat – Soltústik Qazaqstan oblysynda polıtseıler 18 jastaǵy jigitti marapattady. Ol boranda inisin qutqarǵan edi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Esil aýdany polıtsııa bóliminiń basshysy Erlik Eslámbekov Birlik aýylyna baryp, 18 jastaǵy Ernııaz Áshkendi marapattady. Ol qysta azamatqa tán minez kórsetip, inisin qutqarǵan edi.
Oqıǵa aqpan aıynda boldy. Ernııaz atqa jegilgen shanaǵa minip, 7 jastaǵy inisimen Esil ózeni jaqta júrgen jylqyny qaıyrýǵa aýyl syrtyna shyqqan. Birazdan keıin boran kúsheıip ketken. Saldarynan olar qaıtar joldy taba almaı, adasyp ketedi.
Balalardy izdeýge aýyl turǵyndary, polıtseıler, qutqarýshylar jáne qoryqshylar shyqty. Aǵasy men inisi tún ortasynda, tek 6 saǵattan keıin ǵana tabyldy.
«Ernııazdyń isine tánti boldyq. Ol ústindegi qalyń kıimin sheship, inisine kıgizip, arqasyna mingizip alypty. Eki bala da sharshaǵan, tońǵan, tipti sóıleýge álderi kelmedi. Sol kúni boran bastalǵanda mingen attary beti aýǵan jaqqa ala qashqan. Sondyqtan balalar túsip qalyp, aýylǵa jaıaý barmaq bolǵan», - deıdi aýdandyq polıtsııa bóliminiń bastyǵy Erlik Eslámbekov.
Ernııazdyń aıtýynsha, olar qatty tońǵan. Jylynyp, demalý úshin qardy úńgip, ishine kirip jylynbaq bolǵan. Aýdannyń polıtseıleri balalardyń isi kópke úlgi etip, alǵys hatpen marapattady.
