SQO-da qatty aıazǵa baılanysty jedel shtab jumys istep jatyr
PETROPAVL. KAZINFORM — Soltústik Qazaqstan oblysynda Ózbekstan azamattary bar avtobýs jolda qalyp, sheteldikterdi jyly jerge evakýatsııalaýǵa týra keldi.
SQO Tótenshe jaǵdaılar departamenti brıfıng ótkizip, óńirdegi ahýalǵa toqtaldy. Oblysqa qatty aıazdyń kelýine baılanysty 13 qańtar saǵat 19.00-den bastap departament bazasynda jedel shtab qurylyp, jumys istep jatyr. Maqsat — tıisti qyzmettermen ózara baılanys ornatyp, aýa raıynyń kúrt sýytýyna baılanysty tótenshe jaǵdaılardyń aldyn alý, turǵyndardyń qaýipsizdigin qamtamasyz etý, sondaı-aq ómirlik mańyzy bar nysandardyń úzdiksiz jumysyn baqylaý.
Ótken táýlikte SQO TJD qyzmetkerleri segiz ret jedel shaqyrtýǵa bardy. Onyń úsheýinde apattyq-qutqarý jumysy júrgizildi.
— Ótken túnde Taıynshadan Petropavlǵa kámelet jasyna tolmaǵan, jaǵdaıy aýyr naýqas bar reanomobıldi alyp júrýge týra keldi. Taǵy bir jaǵdaıda Mamlıýt aýdany aýmaǵynda Túmennen Shymkentke qaraı bara jatqan jolaýshylar avtobýsy tańǵa jaqyn isten shyǵyp, qutqarýshylar Ózbekstan azamattaryn evakýatsııalady. 18 sheteldik Mamlıýtka qalasyndaǵy mektep-gımnazııada ornalasqan evakýatsııalyq pýnktke jetkizildi. Keıin kólik jóndelip, jolyn jalǵastyrdy, — deıdi SQO TJD kezekshi bólimniń bastyǵy Oljas Júnis.
Mamandardyń aıtýynsha, oblys aýmaǵynda 232 jylytý pýnkti bar. Olar táýlik boıy jumys istep, jolda qalǵandardy qabyldaýǵa ázir tur. Azamattyq qorǵanystyń barlyq qyzmeti men arnaıy tehnıkalary daıyndyq rejıminde aýysty. Áýejaı aýmaǵynda MI-8 tikushaǵy da daıyn.
— Qatty aıaz kúnderi úıden uzap shyqpaýlaryńyzdy suraımyz. Ásirese balalar men qarttardy nazardan tys qaldyrmaǵan jón. Al, uzaq jolǵa shyǵýǵa týra kelgen jaǵdaıda qaýipsizdikti esten shyǵarmaǵan jón. Kóliktiń tehnıkalyq jaǵdaıyn tekserip, ózderińizben birge jyly kıim alyp, telefonnyń tolyq qýattalǵanyna nazar aýdaryńyz. Qaıda bara jatqanyńyz jóninde týǵandaryńyzdy eskertińiz, — deıdi SQO TJD basqarmasy bastyǵynyń mindetin atqarýshy Damır Báshenov.
«Qazgıdromet» kásiporny SQO fılıalynyń málimetinshe, qatty aıaz 17 qańtarǵa deıin saqtalmaq.
Buǵan deıin Qazaqstannyń birqatar óńirinde ekinshi aýysym oqýshylary qashyqtan oqıtynyn jazǵan edik.