SQO-da qaterli isiktiń qaı túrleri kóp taralǵan
PETROPAVL. KAZINFORM – Soltústik Qazaqstan oblysynda bıylǵy 8 aıda jańadan 1 338 adamǵa onkologııa dıagnozy qoıyldy.
SQO onkologııalyq ortalyǵy emhanasynyń meńgerýshisi Erqanat Baıtursynnyń aıtýynsha, syrqattardyń 38% obyr erte kezeńde anyqtalǵan, bul ótken jylmen salystyrǵanda 2,4% joǵary. Al, qaralǵandardyń 12% qaterli isik sońǵy satylarda anyqtaldy. Jalpy óńirde taralýy boıynsha sút bezi obyry, kolorektaldy obyr, ókpe jáne teri obyry aldyńǵy qatarda tur.
— Qaterli isikti bastapqy kezeńderde anyqtaýdyń negizgi joly — skrınıng. Bıyl segiz aıda jatyr moıny obyryna tekserý barysynda obyrǵa deıingi aýrýdyń 147 jaǵdaı anyqtalyp, úsh áıelge jatyr moıny obyry dıagnozy qoıyldy. Onyń ekeýinde birinshi, bireýinde ekinshi satyda anyqtaldy, — deıdi Erqanat Baıtursyn.
Al, sút bezi obyry boıynsha skrınıng nátıjesinde 64 áıelde qaterli isik anyqtalsa, onyń 42-sinde obyrdyń birinshi, 22-sinde ekinshi satysy bolǵan.
— Kolorektaldy obyrǵa skrınıng júrgizilip, gemokýlt-test 1 109 oń nátıje berdi, 586 patsıentke kolonoskopııa júrgizildi. Nátıjesinde 165 adamnan obyrǵa deıingi jaǵdaılar anyqtaldy. Sonymen qatar toq ishek obyrynyń 26 jaǵdaıy tirkeldi. Onyń 13-i birinshi, 13-i ekinshi satyda anyqtaldy, — deıdi emhana meńgerýshisi.
Mamandardyń aıtýynsha, skrınıng aýrýdy aıqyn belgileri paıda bolmaı turyp anyqtaýǵa múmkindik beredi. Ortalyq 26 qyrkúıekte áıelderdiń reprodýktıvti júıesiniń onkologııalyq aýrýlarynyń aldyn alýǵa jáne erte anyqtaýǵa arnalǵan Ashyq esik kúnin ótkizbek. Qabyldaýdy onkogınekolog mamandar júrgizetin bolady.
Buǵan deıin Mańǵystaý oblysynda onkologııa men qant dıabetine shaldyqqandar sany artqanyn jazǵan edik.
