SQO-da kásiporyn 45 kg synapty zańsyz saqtap kelgen
PETROPAVL. KAZINFORM — Soltústik Qazaqstan oblysynyń polıtseıleri «Dármek» jedel-aldyn alý is-sharasynyń birinshi kezeńin aıaqtady.
SQO polıtsııa departamenti baspasóz qyzmetiniń málimetinshe, «Dármek» jedel aldyn alý sharasynyń maqsaty — esirtkiniń zańdy aınalymy salasynda quqyq buzýshylyqtardy anyqtaý.
Bes kún ishinde tártip saqshylary oblys aýmaǵyndaǵy 55 ónerkásiptik jáne medıtsınalyq mekemeni tekserdi.
Sonyń on úshinde zań buzýshylyqtar anyqtaldy.
«Quramynda esirtki bar preparattardy saqtaý men paıdalanýdyń qatań erejesi bar, bul olardyń „qara naryqqa“ enýine jol bermeý úshin qajet. Tekserý nátıjeleri boıynsha jaýapty tulǵalarǵa qatysty 24 ákimshilik hattama toltyryldy. Barlyǵy 16 kg 720 gr prekýrsor, 1030 ampýla jáne 120 psıhotroptyq dári, 394 esirtki ampýlasy tárkilendi. Sondaı-aq, kásiporyndardyń birinde joıylýy tıis synaptyń qory tabyldy. Ýly zattyń jalpy salmaǵy — 45 kg», — deıdi esirtki qylmysyna qarsy is-qımyl basqarmasynyń bastyǵy Rýslan Saparov.
Іs-sharany ótkizý kezeńinde SQO polıtsııa departamenti esirtki qylmysyna qarsy is-qımyl basqarmasynyń qyzmetkerleri zańsyz aınalymnan 1 keliden astam sıntetıkalyq esirtki tárkilep, ótkizýdiń eki faktisiniń jolyn kesti.
