SQO-da kásipkerlerge eńbek zańnamasyn buzǵany úshin 5 mln teńge aıyppul salyndy
PETROPAVL. KAZINFORM - Soltústik Qazaqstan oblysynda bıyl eńbek ınspektsııasyna 443 shaǵym tússe, onyń 400-i eńbek quqyǵynyń buzylýyna qatysty bolǵan.
SQO kásipkerler palatasynda bıznes ókilderine eńbek zańnamasyn qatań saqtaý qajettigi taǵy da eskertildi. Kezdesýge memlekettik organdardyń ókilderi men qoǵamdyq tamaqtaný salasynda júrgen kásipkerler qatysty.
Іs-sharanyń negizgi maqsaty - eńbek daýlarynyń aldyn alý, óndiristegi qaýipsizdikti kúsheıtý jáne kásipkerlerdiń quqyqtyq saýattylyǵyn arttyrý boldy. Jıyn barysynda jumys berýshilerge, kadr mamandaryna, býhgalterler men meıramhana, kafe ákimshilerine Eńbek kodeksi talaptaryn saqtaýdyń mańyzdylyǵy túsindirildi.
Jıyn barysynda negizgi baıandamany memlekettik eńbek ınspektsııasy komıtetiniń SQO boıynsha departamentiniń basshysy Mıras Sabaǵanov jasady. Ol jumys berýshilerge qyzmetkerlerdi jazataıym oqıǵalardan saqtandyrý, Enbek.kz júıesine málimetterdi ýaqytyly engizý, sonyń ishinde sheteldik jumysshylar týraly aqparat berý, eńbek sharttaryn durys rásimdeý sııaqty mańyzdy talaptardy eske saldy.
Mıras Sabaǵanovtyń aıtýynsha, jyl basynan beri departamentke 443 ótinish kelip túsken. Onyń 403-i eńbek quqyǵynyń, qalǵany eńbek qaýipsizdigi máselelerine baılanysty bolǵan. Tekserý nátıjesinde 95 zań buzýshylyq anyqtalyp, 57 nusqama berilgen. Sondaı-aq 32 jeke jáne zańdy tulǵa ákimshilik jaýapkershilikke tartylyp, jalpy somasy shamamen 5 mln teńge aıyppul salyndy.
Osy jyldyń esepti kezeńinde 7 jazataıym oqıǵa tirkelgen. Bul ótken jyldyń sáıkes kezeńimen salystyrǵanda 58% az.
Kezdesý barysynda jaz mezgilinde kámeletke tolmaǵandardy jumysqa qabyldaý máselesi de kóterildi. Eńbek ınspektsııasynyń eńbek qatynastary bóliminiń basshysy Ásel Abdýǵalıevanyń aıtýynsha, Qazaqstanda eńbek sharty 14 jastan bastap ata-ananyń qatysýymen jasalady. Al 15-16 jastaǵy jasóspirimder óz betinshe kelisimshart jasaı alady, biraq olardyń túngi ýaqytta jumys isteýine, artyq jumysqa tartylýyna jáne keıbir aýyr eńbek túrlerin atqarýyna zańmen tyıym salynǵan.
Sonymen qatar jıynda adam saýdasynyń aldyn alý, eńbekti qanaýǵa jol bermeý jáne kıberqaýipsizdik máseleleri de nazardan tys qalmady.
SQO Polıtsııa departamentiniń málimetinshe, byltyr oblysta 654 ınternet alaıaqtyq faktisi tirkelip, shyǵyn 1,4 mlrd teńgeden asqan. Al osy jyldyń alǵashqy toqsanynda 135 jaǵdaı tirkelip, jalpy shyǵyn 350 mln teńgege jetti. Zardap shekkenderdiń ishinde kásipkerler men túrli kásiporyn qyzmetkerleri de bar.
Buǵan deıin SQO-da orman sharýashylyqtarynda eńbek zańnamasyn buzý faktileri anyqtalǵanyn jazǵan edik.
