SQO-da kásipkerlerdiń salyq bereshegi 6 mlrd teńgege jýyqtady
PETROPAVL. KAZINFORM — Soltústik Qazaqstan oblysynda 1 qyrkúıektegi jaǵdaı boıynsha salyq bereshegi 5,99 mlrd teńgege jetti. Onyń 5,4 mlrd teńgeden astamy zańdy tulǵalarǵa tıesili.
SQO boıynsha memlekettik kirister departamentiniń málimetinshe, bereshektiń negizgi bóligi qosylǵan qun salyǵy men korporatıvtik tabys salyǵyna tıesili. Atap aıtqanda, QQS boıynsha qaryz 3,37 mlrd teńge bolsa, korporatıvtik tabys salyǵy boıynsha bereshek 1,3 mlrd teńgege jetken.
Salyq beresheginiń mólsheri boıynsha «Taıynsha-Astyq» JShS birinshi orynda tur, onyń bıýdjetke qaryzy 1 mlrd 90 mln teńgeden asqan. «Agrofırma Kzyltý — NAN» JShS-niń bereshegi 918 mln teńge shamasynda, «Vıshnevskoe» JShS-gi 343 mln teńge qaryz.
— QR Salyq kodeksiniń 5-taraýynyń 4-paragrafyna sáıkes salyq organdary boryshkerlerge zańnamada kózdelgen májbúrlep óndirip alýdyń barlyq sharalary men tásilderin qoldandy. Qazirgi ýaqytta olardy bankrot dep taný týraly talap qoıý aryzdar berildi, alaıda sottar tarapynan olardy bankrot dep taný týraly sheshimder qabyldanǵan joq, — deıdi departament basshysynyń orynbasary Saıan Meıramov.
Mamandardyń aıtýynsha, jyl basynan beri salyq bereshegin óndirip alý nátıjesinde bıýdjetke 1,7 mlrd teńge tústi.
SQO-da ótelýi ekitalaı salyq beresheginiń kólemi 547,1 mln teńgege jetti.
Buǵan deıin elimizde qansha salyq tóleýshi bar ekenin jazǵan edik.
