SQO-da kásipkerlerdi zańsyz teksergen salyq organdarynyń basshylary jaýapqa tartyldy
PETROPAVL. KAZINFORM - Soltústik Qazaqstan oblysynyń prokýratýrasy memlekettik kirister organdarynyń qyzmetin taldaý barysynda kásipkerlerdiń quqyqtarynyń buzylǵany anyqtaldy.
Bul týraly SQO oblystyq prokýratýrasynyń baspasóz qyzmetinen málim boldy.
Petropavl qalasy men Esil, M.Jumabaev, Shal aqyn, Qyzyljar aýdandarynyń memlekettik kirister basqarmasynyń laýazymdy tulǵalary Kásipkerlik kodeksiniń talaptaryna qaramastan bıznes sýbektilerine salyqtyq tekserýler júrgizdi.
Prokýrorlyq qadaǵalaý aktisi boıynsha atalǵan salyq organdarynyń basshylary tekserý júrgizý tártibin buzǵany úshin ákimshilik jaýapqa tartyldy. Qazirgi ýaqytta aıyppuldar tolyq tólendi, salyqtyq tekserýler zańsyz dep tanyldy jáne joıyldy.
Jyl basynan beri Soltústik Qazaqstan oblysy prokýratýra organdarynyń qadaǵalaý sharalarymen barlyǵy 270 kásipkerdiń quqyqtary qorǵaldy.
«Bıznes sýbektilerine quqyqtar men múddeler buzylǵan jaǵdaıda kásipkerlerdiń quqyqtaryn qorǵaý jónindegi mobıldi top (baılanys telefony +7-771-362-08-99) arqyly oblys prokýratýrasynyń qyzmetkerimen tikeleı baılanysýǵa bolatyndyǵyn eske salamyz»,-delingen habarlamada.
Osyǵan deıin Bas prokýratýra elimizde 7 aıda 5 myńnan astam esirtki qylmysy anyqtalǵany týraly málim etken bolatyn.
