SQO-da kásipkerler tasqynnan kelgen shyǵyndy óteý rásimine narazy
PETROPAVL. KAZINFORM – Soltústik Qazaqstan oblysynda tasqynnan zardap shekken kásipkerler ótemaqy ala almaı jatyr. Jalpy óńirlik komıssııa osy ýaqytqa deıin kásip ıelerine keltirilgen zalaldy óteý týraly tek tórt ótinishti qarap, qaıtaryp jibergen.
SQO Kásipkerler palatasy baspasóz qyzmetiniń málimetinshe, sý tasqyny saldarynan zardap shekken bıznes sýbektilerimen oblys prokýrory Qaırat Ábdihanov kezdesti.
Óńirde shaǵyn jáne orta bıznes sýbektilerine keltirilgen múliktik shyǵynnyń mólsherin anyqtaý jónindegi komıssııalardyń qurylǵanyna bir aıdan astam ýaqyt ótti, biraq bul rásim baıaý júrgizilip jatyr. Komıssııa zardap shekken kásipkerlerden túsken tórt ótinishti qujattardyń tolyq bolmaýyna baılanysty qaıtaryp, qaıta júginýge keńes bergen.
Óńirde baǵalaýshylar men tehnıkalyq zertteýshilerdiń azdyǵy jáne olardyń qyzmetin bıýdjetten tóleý máselesiniń durys sheshilmeýi de jumysty tejeýde. Palata ókilderiniń pikirinshe, zardap shekken kásipkerlerdiń kópshiligi tabysyn joǵaltqandyqtan olarǵa ózdiginen 600 myń teńgeni tóleý múmkin emes.
Taǵy bir másele – keı turǵyndar bıznesti tirkeý úshin ne jeke kásipkerlik, ne JShS ashpaı, jeke tulǵanyń atyna jazǵan. Roman Ovcharenko ákesinen qalǵan dámhanany jalǵa berip kelgen. Jas jigittiń ózi jeke kásipker emes. Shyǵyndy óteý boıynsha erejede mundaı jaǵdaı qarastyrylmaǵan.
Kosogor shaǵyn aýdanyndaǵy sý tasqyny saldarynan zardap shekken jeke kásipker Lıýbov Afanasovanyń turǵyn úıi men «Nash» dúkeni tehnıkalyq tekserý qorytyndysyna saı jaramsyz dep tanyldy. Áıel baǵalaý nátıjesimen kelispeıdi.
«Úıimniń aýdany 145 sharshy metr, 10 sotyq jerim, monsha, jylyjaı boldy, osyǵan tek 22,7 mln teńge ǵana ótemaqy bermek. Men bul somaǵa ne alamyn? Eger bıznes te osylaı baǵalansa, onda meniń aıtarǵa sózim joq», - deıdi barynan aıyrylǵan Lıýbov Afanasova.
Kezdesýge SQO kásipkerlik jáne ındýstrııalyq-ınnovatsııalyq damý basqarmasy basshysynyń orynbasary Qanat Shamsýtdınov qatysyp, shyǵyndy óteý erejeleri bekitilgenin, komıssııa músheleri sonyń negizinde jumys istep jatqanyn túsindirdi. Erejege sáıkes, tek turǵyn úıge ǵana ótemaqy bar jáne ol 22,7 mln teńgeden aspaıdy.
Qanat Shamsýtdınov máseleler boıynsha naqty jaýap bermedi, biraq erejeni qurastyrýshylarmen keńesýge ýáde berdi.
Óńirlik kásipkerler palatasy da bul máseleni «Atameken» ortalyq apparatyna jiberip, ótemaqy erejesin ázirleýshi organǵa habarlaý qajettigi týraly ótinish joldady.
Esterińizge sala keteıik, óńirde sý tasqyny saldarynan 204 bıznes sýbektisi zardap shekti, onyń 139-y oblys ortalyǵynda, 65-i Qyzyljar aýdanynda ornalasqan.
SQO-da kásipkerler sý tasqynynan bolǵan shyǵyndy eseptep, baǵalata almaı jatqanyn buǵan deıin de jazǵan edik.
