SQO-da kásipkerdi atyp óltirgen jigit 11 jylǵa sottaldy

PETROPAVL. KAZINFORM – Soltústik Qazaqstan oblysynda adam ólimine ákelgen aýyr qylmys boıynsha sot úkimi jarııalandy. Іs alqabılerdiń qatysýymen qaraldy.

Oqıǵa byltyr 31 qazanda Tımırıazev aýdanyndaǵy Dokýchaevo aýylynda boldy. Sot materıaldaryna sáıkes, 22 jastaǵy Vadım Orlov mas kúıde aldymen tanysyna jeńil dene jaraqatyn salyp, keıin qarýmen qorqytyp, birneshe ret oq atqan.

Sol kúni keshke Orlov jalaqyny talap etý maqsatynda taǵy bir jergilikti turǵyn – «BýrBat» JShS dırektory A.Batanovtyń úıine barǵan. Úıden qarýmen shyqqan Batanov eskertý retinde joǵaryǵa oq atqan. Orlov kóp oılanbastan myltyqta qalǵan jalǵyz oqpen fermerdi ishinen atqan. Keıin ol qansyrap jatqan er adamnyń qarýyn alyp, basynan atqan. Jábirlenýshi alǵan jaraqattarynan oqıǵa ornynda kóz jumdy.

Sotta Orlovpen birge 39 jastaǵy Vıktor Torgashev te jaýap berdi. Ol sol kúni Orlovpen birge júrip, keıin qylmys quralyn jasyryp, polıtsııaǵa habarlamaǵan.

Sottyń úkimimen Vadım Orlov QR QK-niń 108-1-baby 1-bóligi (densaýlyqqa jeńil zııan keltirý), 115-baby (qorqytý) jáne 99-baby 1-bóligi (adam óltirý) boıynsha kináli dep tanylyp, 11 jylǵa bas bostandyǵynan aıyryldy. Jazasyn ortasha qaýipsizdik mekemesinde óteıdi.

Vıktor Torgashev QR QK-niń 432-baby (qylmysty jasyryp qalý) boıynsha kináli dep tanylyp, 2 jylǵa bas bostandyǵynan aıyryldy. Ol jazasyn eń tómengi qaýipsizdik mekemesinde óteıdi.

Sot jábirlenýshi taraptyń azamattyq talaptaryn ishinara qanaǵattandyryp, Orlovtan marqumnyń týystarynyń árqaısysyna 2,5 mln teńgeden moraldyq zııan, sondaı-aq materıaldyq shyǵyndar men sot shyǵyndaryn óndirýdi mindettedi.

Úkim zańdy kúshine engen joq.

Esterińizge salaıyq, SQO-da 22 jastaǵy jigit kásipkerdi atyp óltirdi degen kúdikke ilingenin jazǵan edik.