SQO-lyq kásipker ýchaskesinen kanal ótkizgen ákimdikten ótemaqy ala almaı júr
PETROPAVL. KAZINFORM – Soltústik Qazaqstan oblysynda «Qyzyljar2020» JShS basshysy Qyzyljar aýdany ákimdiginen keltirilgen zalaldyń ornyn toltyrýdy jáne basqa ýchaskelerine qoljetimdilikti qalpyna keltirýdi talap etip otyr.
Másele Kásipkerler palatasy janyndaǵy Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńeste qaraldy.
Oqıǵa sý tasqynyna baılanysty tótenshe jaǵdaı kezinde bolǵan. Osy jyldyń aqpan aıynda aýdan ákimdigi «Qyzyljar2020» JShS-niń úsh jer teliminiń birin ýaqytsha alyp, Esil ózeninen kanal qazǵan. Biraq jumys barysynda bir jer telimmen shektelmeı, oǵan irgeles jatqan ýchaskeni de qamtyǵan.
Kásipkerler palatasy bóliminiń basshysy Aıdos Keńbeıilovtyń aıtýynsha, saldarynan jerdiń qunarly qabaty alynyp, jer teliminiń tutastyǵy buzylǵan. Endi jerdi qalpyna keltirý úshin kásipker shyǵynǵa batpaq. Sonymen qatar, kanal salý barysynda seriktestiktiń bazdary men ǵımarattar ornalasqan úshinshi jer telimine baratyn jol jabylyp qalǵan.
Onyń pikirinshe, kanal qurylysyna bólingen 125 mıllıon teńge qarajatqa ótkel salýǵa da jeter edi.
Kásipker Eldar Bazarov usynǵan dálelderge qaramastan, aýdan ákimdiginiń ókilderi zańbuzýshylyqty joqqa shyǵaryp, shyǵyndy óteýden bas tartyp otyr.
- Ákimdik osy jyldyń sońyna deıin bir úlken jer telimin ýaqytsha alǵan, oǵan esh qarsylyǵym joq. Biraq másele 417-shi jerge qatysty. Ákimdik resmı túrde bul jerde eshqandaı jumys júrgizilmegenin aıtady. Sonda kanal qalaısha bir jaǵadan ekinshisine ótti? Ákimdik kanal ústinen kópir salynady dep ýáde bergen, biraq jaz ótti, kúz keldi, al nátıje joq, – deıdi «Qyzyljar2020» JShS dırektory Eldar Bazarov.
Qyzyljar aýdany jer qatynastary bóliminiń basshysy Rýslan Aspanov kompanııaǵa ornyna basqa jer berýdi nemese konfıgýratsııasyn ózgertýdi usynǵan. Biraq kásipker óz jerine qoljetimdilikti qalpyna keltirýdi talap etip otyr.
Ekonomıkalyq tergeý departamenti basshysynyń orynbasary Maksım Pahno bul máseleniń kúrdeli ekenin moıyndady.
Onyń aıtýynsha, tótenshe jaǵdaı kezinde qabyldanǵan sheshimderdiń saldary qazir shyǵa bastaǵan. Kásipkerdiń shaǵymy boıynsha endi tekseris júrgizilmek.
Buǵan deıin SQO-da sýyq aýa raıy men dızel sapasy egin oraǵyn tejep turǵanyn jazǵan edik.