SQO-da kásipodaq pen sybaılas jemqorlyqqa qarsy qyzmet memorandýmǵa qol qoıdy

PETROPAVL. QazAqparat – Soltústik Qazaqstan oblysynda kásipodaq uıymdary qoǵamdyq indet – para alýmen kúreste óz úlesin qosady. Búgin kásipodaq ortalyǵy men jemqorlyqqa qarsy qyzmet memorandým jasasty, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttiginiń SQO boıynsha departamenti baspasóz qyzmetiniń málimetinshe, «Antikor ortalyǵy» servıstik ortalyǵynda ótken sharaǵa oblystyq kásipodaq uıymdarynyń tóraǵalary, «Jańarý» qoǵamdyq uıymy ókilderi, aqparattyq-nasıhat shtabynyń músheleri qatysty.

Departament basshysy Ernar Baıanǵazınniń pikirinshe, sybaılas jemqorlyqpen kúres óz nátıjesin berýi úshin oǵan qoǵam bolyp atsalysý qajet. Sheshimin kútken máseleler barshylyq. Máselen Qazaqstan boıynsha paraqorlarmen kúresýge bar bolǵany 1300-den astam maman jumyldyrylǵan. Bul az. Al azamattyq qoǵam, sonyń ishinde kásipodaq qoldaý bildirgen jaǵdaıda olardyń qatary artpaq. Óıtkeni SQO boıynsha mundaı uıymdardyń sany 1200-den asady.

«Kásipodaq ejelden quqyq qorǵaý uıymdarynyń sanatynda. Sol sebepti bizdiń negizgi mindetimiz – azamattardyń eńbek quqyǵyn kúndelikti qorǵaý, eńbekaqysynyń ýaqytynda tólenýin qamtamasyz etý, eńbekaqyny tóleýde kemsitýge jol bermeý», - deıdi aımaqtyq kásipodaq ortalyǵynyń tóraǵasy Erik Nuraqaev.

Kásipodaq ókilderi qoǵamdyq keńesterdiń quramyna kirgen. Sondaı-aq azamattar quqyǵynyń saqtalýyn qadaǵalaıtyn arnaıy monıtorıng toptaryna, jumys komıssııalaryna, shtabtarǵa múshe.

«Eń aldymen kásipodaq - eleýli resýrstarǵa ıe, qatysýshylar sany kóp jáne eń aldymen bizdiń qyzmetkerlerimizdiń, qyzmetshilerdiń, barlyq sala ókilderiniń múddesin qorǵaıtyn mańyzdy qurylym ekenin túsiný kerek. Odaqtyń múddesi men sybaılas jemqorlyqqa qarsy qyzmettiń múddesi sáıkes keletin qoǵamnyń úlken bóligi», - deıdi QR Sybaılas jemqorlyqqa qarsy is-qımyl agenttigi SQO boıynsha departament jetekshisi Ernar Baıanǵazın.