SQO-da kásipkerlerge sút fermasyn ashýǵa jeńildetilgen nesıe beriledi

PETROPAVL. QazAqparat – Soltústik Qazaqstan oblysynda keler jyly 10 sút fermasy salynady, nátıjesinde qosymsha 300-den astam turaqty jumys orny ashylmaq, dep habarlaıdy QazAqparat tilshisi.

Bıyl SQO belgilengen mejeni artyǵymen oryndap, 630 mlrd teńgeniń aýyl sharýashylyǵy ónimin shyǵardy. Bul osydan úsh jylǵy kórsetkishten 1,5 ese artyq. Óńir basshysy Qumar Aqsaqalovtyń pikirinshe, aýyl sharýashylyǵy salasyn ártaraptandyrý, dándi daqyldardyń jańa túrlerin egý, sút fermalaryn kóptep salý – óz nátıjesin berip jatyr.

Tek bıyl óńirde 3 tsıfrly sút fermasy paıdalanýǵa berildi. Aldaǵy jyly olardyń qataryna taǵy ony qosylady. Qazir Qyzyljar, M.Jumabaev, Aıyrtaý aýdandarynda ekeýden salynyp jatsa, Ǵ.Músirepov aýdanynda bireýiniń qurylysy bastaldy. «Qyzyljar-Sút» JShS sút kesheni 720 basqa arnalǵan. Kásipker nysannyń qurylysyna 2,1 mlrd teńge jumsaıdy. Búginge deıin qora-qopsy salyndy, qazir qondyrǵylardy ornatý jumystary júrgizilip jatyr. Avstrııadan 360 taıynsha ákelinedi dep josparlanǵan. Keler jyly maýsym aıynda iske qosylatyn fermada qosymsha 35 jumys orny ashylmaqshy.

«Sút fermalary óńirde kóptep ashylýy kerek. Nátıjesinde turaqty jumys oryndary ashylady. Turǵyndar jyl boıy jumyspen qamtylady. Taǵy bir tıimdi tusy – sút óndirisimen birge jemshóp bazasy da damıdy», - deıdi Qumar Aqsaqalov.

SQO-da mal sharýashylyǵyna qatysty jobalardy júzege asyratyndarǵa keler jyldan bastap jeńildetilgen nesıe berilmekshi.

«Sharýashylyqtardyń shyǵynyn azaıtý maqsatynda keler jyldan bastap tómen paıyzben nesıe beremiz. Qaıtarý merzimi de kásipkerlerge yńǵaıly bolmaq. Osy maqsatqa bıýdjetten 1 mlrd 800 mln teńge bóldik. Aýyldarda máselen, sút fermalaryn ashatyn bolsa 200 mln-nan 250 mln teńgege deıin beremiz», - deıdi óńir basshysy Qumar Aqsaqalov.

Eldi mekenderde sút fermalarynyń ashylýymen 300-den astam turaqty jumys orny paıda bolmaq.