SQO-da kásipkerlerdi qoldaý maqsatynda 62,4 mlrd teńgeniń kelisimine qol qoıyldy
«PROTECTING BUSINESS AND INVESTMENT», ıaǵnı kásipkerler men ınvestorlarǵa naqty kómek jobasynyń maqsaty qolaıly ınvestıtsııalyq ahýal jasaý jáne bıznes pen ınvestorlardyń bılik ókilderine senimin arttyrý.
«Joba sheńberinde Investordy memlekettik qyzmet isteri jáne sybaılas jemqorlyqqa qarsy is-qımyl agenttiginiń qyzmetkerleri tolyq súıemeldeıdi. Negizgi baǵyttary - kásipkerlerdi quqyqtyq qorǵaý, bıznes úderisterdi ońtaılandyrý, retteýge yqpal etý, qoǵamdyq baqylaý jáne ınvestorlardyń sybaılas jemqorlyqqa qarsy saýattylyǵyn arttyrý. Departament barlyq qoljetimdi resýrstardy paıdalana otyryp, kásipkerlerdi jáne ınvestorlardy kez kelgen «qysymnan» qorǵaýǵa barynsha yqpal etedi», - deıdi Memlekettik qyzmet isteri jáne sybaılas jemqorlyqqa qarsy is-qımyl agenttiginiń SQO boıynsha departamentiniń bas mamany Amangeldi Satanov.
Jobaǵa qatysýǵa nıet etken barlyq ınvestorlarmen jáne kásipkerlermen kelisim jasalady. Onyń sheńberinde departament pen ınvestor ózderine birqatar mindettemeler alady. Mysaly, kásipker óz máselesin sheshý úshin para bermeýge kelisedi.
SQO-da «Radýga» JShS, «Mámbetov ı K» KS, «BioOperations» JShS, «Taıynsha maı» JShS, «EMS -agro» JShS, «Severnyı stroıtel» JShS, «Kazmel» JShS, «Golýb» JK sııaqty 8 jergilikti jáne sheteldik ınvestorlarmen jalpy somasy 62,4 mlrd teńgeniń kelisimine qol qoıyldy. Joba iske qosylǵannan beri oblys kásipkerlerinen 25 ótinish kelip túsken.
«BioOperations» JShS sheteldik jumysshylarǵa vıza berýge qatysty ótinish bildirdi, másele oń sheshildi. Sondaı-aq, Ǵ. Músirepov aýdanynyń Prıvolnoe aýylynda jer telimin rásimdeýge qatysty «Golýb» JK máselesin sheship berdik», - deıdi Amangeldi Satanov.
Kásipkerler joba aıasynda memlekettik baǵdarlamalar boıynsha keńes surap, júgine alady. Bul oraıda oblystyq kásipkerler palatasynyń kómegi zor.
