SQO-da kásipkerler palatasynyń qaýyrt jelisine 2 myńnan astam qońyraý tústi
Tótenshe jaǵdaı rejıminiń engizilýine baılanysty SQO-da bıznes sýbektileriniń jumysyna birqatar shekteý engizildi. Máselen, dámhanalar men meıramhanalardyń jumys ýaqyty saǵat 9.00-den 18.00-ge deıin qysqartylyp, spırttik ishimdikter satýǵa tyıym salyndy. Sýpermarketterdiń jumysy da saǵat 21.00-ge deıin shekteldi. Jol boıyndaǵy dámhanalar, qarý satý dúkenderi ýaqytsha jabyldy. Munyń bárine óńir kásipkerleri túsinistik tanytyp jatyr.
«Tótenshe jaǵdaı engizilgesin-aq kásipkerler palatasynda shuǵyl sharalar qolǵa alynyp, kezekshilik jáne koll-ortalyq quryldy. Oǵan bıznes sýbektileri habarlasyp, óz suraqtaryna jaýap ala aldy. Negizinen qoǵamdyq tamaqtaný oryndarynyń jumys rejımi, alkogol ónimderin satý boıynsha habarlasty. Sondaı-aq shekarany kesip ótý boıynsha suraqtar boldy. Óıtkeni kásipkerlerdiń arasynda júk tasymalymen aınalysatyndar bar. Sondyqtan kásipkerler palatasynyń ókilderi blokpostarǵa shyǵyp, osy máseleniń qanshalyqty sheshilgenin kórdi. Keshegi kúnge deıin 2 myńnan astam qońyraýdy qabyldadyq», - deıdi SQO kásipkerler palatasy dırektorynyń orynbasary Jeńis Qazıev.
Mamandardyń aıtýynsha, qazir jaǵdaı turaqtalyp keledi. Sall-ortalyqqa habarlasýshylar sany azaıǵan. Biraq keı máseleler áli de ózektiligin joıǵan joq.
«Bıznes sýbektileri aımaqtyq keńesiniń otyrysy ótti. Bul jerde kásipkerler birqatar máselelerdi aıtty, onyń negizgisi tólemderdi keıinge shegerý týraly, óıtkeni keıbiriniń bankter aldynda mindettemeleri bar. Tótenshe jaǵdaı rejıminde kommýnaldyq tólemder qalaı esepteledi, bul máseleler jergilikti atqarýshy bılik ókilderimen birge qaraldy. Apta sońynda taǵy bir jınalamyz», - deıdi Jeńis Qazıev.
