SQO-da kásipkerler memlekettik ulttyq tabıǵı parkin qurýdy usyndy
SQO kásipkerler palatasy baspasóz qyzmetiniń málimetinshe, týrıstik salany damytý máseleleri oblystyq kásipkerler palatasynyń óńirlik keńesi janyndaǵy týrızm komıtetiniń otyrysynda talqylandy.
Imantaý-Shalqar kýrorttyq aımaǵy qazirgi ýaqytta «Kókshetaý» memlekettik ulttyq tabıǵı parki quramyna kiredi. Kásipkerlerdiń aıtýynsha, barlyq salyq kórshi Aqmola oblysyna ketedi, bul durys emes.
«Imantaý-Shalqar kýrorttyq aımaǵy 2018 jyldan bastap týrıstik salany damytýdyń 2019-2025 jyldarǵa arnalǵan memlekettik baǵdarlamasyna kirgen. Sáıkesinshe týrızmdi damytýdyń top-10 perspektıvaly aımaǵy bolǵanyna qaramastan, is júzinde «Kókshetaý» MUTP Zerendini damytýǵa basymdyq bergen.
Bizdiń barlyq salyǵymyz Aqmola oblysyna ketedi, al bizde birneshe jyldan beri sheshilmeı jatqan másele jeterlik. Sonyń biri – jol. «Kókshetaý» Zerendiden qalǵan ınvestıtsııany ǵana bizdiń kýrorttyq aımaqqa salatynyn kórip otyrmyz», - deıdi Aıyrtaý aýdanynyń «Dosýgovyı tsentr» JShS dırektory Vıktor Nadıarnyı.
Ulttyq parktiń málimetinshe, byltyr Shalqar-Imantaý aımaǵyna 42 myń týrıst kelgen, bul 2021 jylmen salystyrǵanda 10 myńǵa artyq.
«Bıyl Aqmola oblysynyń shekarasynan Lobanov aýylyna deıingi 11 km joldy jóndeýge qarajat bólindi. Qalǵandary boıynsha jobalyq-smetalyq qujat bar, Qarjy mınıstrligine bıýdjettik ótinim berildi, respýblıkalyq bıýdjettik komıssııanyń otyrysyn kútemiz. Salyq jaıyna keletin bolsaq, ulttyq park Aqmola jáne Soltústik Qazaqstan oblystaryna bólingen. Qyzyljar aýdanyndaǵy Sogrovskıı qoryǵy da Kókshetaýdan 200 shaqyrym jerde jatqanymen osy ulttyq tabıǵı parkke qaraıdy. Al jeke ulttyq park qurý máselesi Ekologııa mınıstrliginde sheshilýi kerek», - deıdi SQO kásipkerlik jáne ındýstrııalyq-ınnovatsııalyq damý basqarmasynyń týrızmdi damytý bóliminiń basshysy Qanat Shamsýtdınov.
SQO kásipkerler palatasynyń jobalardy súıemeldeý bóliminiń bastyǵy Aslan Nurseıitov bul máseleni respýblıkalyq deńgeıde sheshý úshin Atamekenniń ortalyq apparatyna jiberiletinin atap ótti.
