SQO-da kásipker jurttyń paıyn kepilge berip, 600 mln teńgeni qaltasyna basqan

PETROPAVL. QazAqparat – Soltústik Qazaqstan oblysynda «Jarqyn-SK» JShS basshysy sottaldy. Ol aýyl turǵyndarynyń jer úlesin jalǵan qujat jasaý arqyly bankke kepilge bergen. 600 mln teńgeni qaltasyna basqan, dep habarlaıdy QazAqparat tilshisi.

Petropavl qalalyq sotynyń málimetinshe, búgin sot «Jarqyn-SK» JShS basshysy M.-ǵa qatysty qylmystyq isti qarady. Oǵan bir top adammen aldyn ala kelisim boıynsha asa iri mólsherde jurttyń dúnıesin urlady degen aıyp taǵylǵan edi.
Sottalýshy M. Aıyrtaý aýdanynda aýyl turǵyndary jer úlesin bergen «Jarqyn-SK» JShS basqarǵan. Ol alaıaqtyq jasaý maqsatynda JShS qatysýshylarynyń ortaq jınalysynyń jalǵan hattamasyn jasap, sol arqyly 777 adamnyń jer úlesin bankke kepilge qoıǵan.
2017 jyldyń maýsymynda qaıtarmaıtynyn bile tura 600 mln teńge nesıe alyp, ony kerek-jaraǵyna jaratqan. Al qylmysyn jasyrý úshin úsh jyldan keıin «Jarqyn-SK» JShS basqa bireýlerdiń atyna resimdegen.
Prokýror sottalýshyǵa 9 jyl jaza kesýdi surady.
M. óz kinásin moıyndamady, kerisinshe, ózin aqtaýdy surady. Onyń kinási tolyq dáleldendi.
Nátıjesinde Petropavl qalalyq soty M.-ny 6 jy 8 aıǵa bas bostandyǵynan aıyrdy. Sottalýshy jazasyn qylmystyq-atqarý júıesiniń ortasha qaýipsizdik mekemesinde óteıdi. Sondaı-aq, 10 jylǵa deıin basqarýshylyq jáne materıaldyq jaýapkershiligi bar laýazymdardy qarjylyq, kommertsııalyq uıymdarda atqara almaıdy.