SQO-da kásipker týǵan aýylyna oralyp, eldi mekendi damytýda

PETROPAVL. QazAqparat – Soltústik Qazaqstan oblysyndaǵy Prekrasnoe eldi mekeni jergilikti kásipkerdiń arqasynda damyp jatyr, dep habarlaıdy QazAqparat tilshisi.

SQO ákimi Qumar Aqsaqalov bul jaıynda áleýmettik jelidegi óz paraqshalarynda jazdy.

«Búgingi posttyń keıipkeri - Baqyt Qusaıynov. 9 jyl buryn Baqyt Aıyrtaý aýdanyndaǵy ózi týǵan Prekrasnoe aýylyna kóship keldi. Sodan beri ol aýyl sharýashylyǵyn damyta otyryp, týǵan aýylyn damytýmen de aınalysyp keledi. Bolashaǵy joq aýyldardyń sanatyndaǵy eldi mekenge jan bitirip, qalpyna keltirdi», - dep jazdy oblys ákimi. ⠀
Qazir bul aýylda 600 sıyrǵa arnalǵan zamanaýı sút fermasy salynyp jatyr. Byltyr jańadan 11 baspana turǵyzyldy. Bıyl kásipker taǵy 10 úı kóterip, shaǵyn ortalyq, dúken, feldsherlik-akýsherlik pýnkt ashýdy josparlap otyr.

«Baqyt Qusaıynov – óz Otanynyń naǵyz patrıoty. Ol sózdiń emes, istiń adamy. Baqyt Qusaıynovqa alǵys aıtamyn. Aýylda qalaı jumys isteý kerektigi jóninde basqalar odan úlgi alýy kerek. Týǵan aýylyna oralyp, barlyǵyn qaıta iske qosyp jatyr. Aýyldastaryna turǵyn úı salyp berdi. Olarǵa jumys isteý úshin jaqsy jaǵdaı jasaýda. Al ıesi bar aýyldyń bolashaǵy aıqyn», - dedi Qumar Aqsaqalov.

SQO ákimi bıýdjet esebinen eldi mekenge asfalt jol salyp berýge ýáde etti.