SQO-da kásipker kóshelerdi dezınfektsııalaýǵa kómek kórsetpek
PETROPAVL. QazAqparat –Qyzyljar aýdanynda turatyn kásipker aýyl-qala kóshelerin dezınfektsııalaý jumystaryna kómek kórsetpek, dep habarlaıdy QazAqparat tilshisi.
SQO Kásipkerler palatasy baspasóz qyzmetiniń málimetinshe, qaýipti indetpen kúresýde óńirdiń kásipkerleri qoldarynan kelgenshe kómektesýge ázir. Solardyń biri - Qyzyljar aýdanynyń jeke kásipkeri Aleksandr Morozov. Onyń búrikkish quraldary bar. Bul quraldarmen halyq kóp júretin oryndardy, aıaldamalardy óńdeýge bolady.
«Mendegi búrikkish akkýmýlıatordyń kómegimen jumys isteıdi. Qýatty qurylǵymen 400-500 sharshy metr jerdi dezınfektsııalaýǵa bolady. Óz kóligim bar. Qala-aýylda zararsyzdandyrý jumystaryn júrgizýge ázirmin», - deıdi Aleksandr Morozov.
Onyń aıtýynsha, qoldaǵy bar eki búrikkishpen 1 mınýttyń ishinde bir aıaldamany tolyq zararsyzdandyryp shyǵýǵa bolady eken.
«Bizdiń arnaıy qyzmetterdiń qandaı zararsyzdandyrǵysh preparattarmen jumys istep jatqanyn bilmeımin. Biz mundaı indetke daıyn bolǵan joqpyz. Sol sebepti keı jumysshylardyń qolyndaǵy búrikkishter shaǵyn ǵana, onymen úlken aýmaqty dezınfektsııalaý qıyn. Meni tıisti preparatpen qamtysa, qatarlaryna qosylar edim», - deıdi jeke kásipker.
Qosymsha qorǵanysh zattarymen, kıimmen qamtysa, óz qyzmetkerin de bul jumysqa shyǵarýǵa daıyn.
«Morozov» JK turǵyndardyń kilem, jıhazdaryn hımııalyq kásibı tazartýmen aınalysady. Qazirgi ýaqytta óńir turǵyndarynan, meıramhanalar, meımanhana men dámhanalardan túsetin tapsyrys azaıǵan.
«Bıznes-Bastaý» baǵdarlamasynyń túlegi, Qyzyljar aýdanynyń turǵyny Dýman Isın qoıan ósirýdi qolǵa alǵan. Ol da dezınfektsııa jumystaryn júrgizýge ázir.
