SQO-da kásipker alaıaqtyń qarmaǵyna ilinip, 6 mln teńgesinen aıyryldy
PETROPAVL. QazAqparat – Soltústik Qazaqstan oblysynda zyǵyr satyp almaq bolǵan kásipker alaıaqtyń qurbanyna aınalyp, 6 mln teńgesinen aıyryldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, zardap shekken de, ony qarmaǵyna iliktirgen alaıaq ta Aqmola oblysynyń turǵyndary.
Qarasha aıynda aqmolalyq kásipker zyǵyr satyp alatyny jaıly habarlandyrý beredi. Oǵan «satýshy» habarlasyp, ónimniń sapasyna zerthana arqyly kózin jetkizsin dep zyǵyrdyń úlgisin jiberedi. Taýar unap, kásipker alatyn bolyp, kelisim boıynsha SQO Esil aýdanyndaǵy sharýashylyqtardyń birine keledi. Sol jerde aýylsharýashylyq qurylymynyń janynda zyǵyr tıeýge kelgen «KamAZ» avtomashınalaryn kórgen er adam, «satýshynyń» qolyna 6 mln teńgesin ustatqan. Al alaıaq aqsha qolyna tıisimen sharýashylyq basshysynan ónimdi artýǵa kelisýge kettim dep, sol boıy qarasyn batyrǵan.
Seriktestikte zyǵyr «satqan» adamdy eshkim bilmeıtin bolyp shyqty. San soǵyp qalǵan kásipker aýdandyq polıtsııa bólimine júgindi.
Atalǵan fakti «Alaıaqtyq» baby boıynsha Sotqa deıingi tergep-tekserýlerdiń biryńǵaı tizilimine engizildi. Jedel-izdestirý is-sharalary bir aıǵa sozyldy.
«Qylmys jan-jaqty aldyn ala daıyndalǵan. Kúdikti, Kókshetaý qalasynyń 32 jastaǵy turǵyny byltyr ǵana túrmeden bosap shyqqan, ol alaıaqtyq jasaǵany úshin sottalǵan. Alaıaqtyń tártip saqshylaryna ustalmaı, biraz júrip qalýyna krımınaldyq tájirıbesi septigin tıgizgen. Degenmen, qyzmettik issapar barysynda jedel ýákilder onyń Nur-Sultan qalasynda júrgenin anyqtady», - deıdi Esil aýdanynyń polıtsııa bóliminiń bastyǵy Erlik Eslámbekov.
Tártip saqshylarynyń aıtýynsha, kúdiktini ustaýǵa astanalyq polıtseıler kómektesti. Qazirgi ýaqytta ol tergeý ızolıatorynda otyr. Er adamnyń SQO aýmaǵynda jasalǵan taǵy eki alaıaqtyqqa qatystylyǵy anyqtaldy. Tergeý aıaqtalǵan joq.
