SQO-da kásibı bilim berip, qaıta daıarlaıtyn 33 oqý ortalyǵy bar
PETROPAVL. QazAqparat – Soltústik Qazaqstan oblysynda kásipkerler palatasynyń uıytqysymen kásibı bilim beretin, qaıta daıarlaıtyn, biliktilikti arttyratyn 33 oqý ortalyǵy jumys istep jatyr, dep habarlaıdy QazAqparat tilshisi.
SQO Kásipkerler palatasy baspasóz qyzmetiniń málimeti boıynsha, osyndaı oqý ortalyqtarynyń biri Jambyl aýdanynda ornalasqan. Byltyr jyl sońynda munda «býhgalter» mamandyǵy boıynsha jańadan kýrs ashyldy. Bul kásip ıeleri óndiriste de, óz isin ashqysy keletinder arasynda da suranysqa ıe.
Nátıjesinde býhgalter mamandyǵyn meńgerip shyqqan 18 kýrsanttyń beseýi birden jumysqa ornalasty.
Budan basqa «Tulpar» oqý ortalyǵy aýyldarda eń qajetti mamandyq - «traktorshylardy» da ázirleıdi. Munda teorııadan basqa, tájirıbege de basa nazar aýdarylady. Oqý orny jergilikti sharýashylyqtarmen kelisimge otyrǵan. Kásipkerler qajet ýaqytta ortalyqtyń kýrsanttaryn tehnıkamen qamtıdy. Mamandyq alǵandardyń keıbiri osy sharýashylyqtarǵa jumysqa ornalasty.
«Alysqa barmaı ózimizdiń eldi mekende oqýǵa múmkindik týyp otyrǵanyna rızamyz. Kásipti osyndaǵy oqý ortalyǵynda qarajat shyǵarmaı, ýaqytymyzdy shyǵyndamaı meńgere alamyz. Barlyq jaǵdaı jasalǵan, tek ynta qoıyp oqysań boldy», - deıdi traktorshy mamandyǵyn meńgerip shyqqan eldi meken turǵyny Aleksandr Sıdorenko.
Jambyl aýdanyndaǵy oqý ortalyǵy 2007 jyly qurylǵan. Osy ýaqyt aralyǵynda oqý orny aýylǵa qajet júzdegen kásibı mamandy ázirledi.
«Túlekter aýdanda ǵana emes, Qazaqstan boıynsha jemisti eńbek etip jatyr. Barlyq sanattaǵy júrgizýshilerdi, traktorshylardy, shashtarazdardy, endi býhgalterlerdi daıarlaıdy. 2019 jyly «Tulpar» oqý ortalyǵy Qazaqstandaǵy kóshbasshy kásiporyndardyń «Top-7» endi. Ol kásiporyndardyń qarjylyq-ekonomıkalyq taldaýy negizinde anyqtaldy», - deıdi SQO kásipkerler palatasy Jambyl aýdandyq fılıalynyń dırektory Oljas Ábilmájinov.
Jalpy, SQO-da osyndaı 33 oqý ortalyǵy jumys istep jatyr.
