SQO-da qasaqana alıment tólemeýshilerdiń qaryzy 338 mln teńgeden asty

PETROPAVL. KAZINFORM — Soltústik Qazaqstan oblysynda bıyl alıment boıynsha qaryzy bar 16 adam qylmystyq jaýapkershilikke tartyldy.

SQO prokýratýrasynyń málimetinshe, qarasha aıynda kámeletke tolmaǵandarǵa arnalǵan mamandandyrylǵan aýdanaralyq sot boryshkerdiń isin qarady. Er adam balasy aldyndaǵy mindettemeni alty aıdan astam oryndamaǵan. Onyń alıment boıynsha bereshegi 3,2 mıllıon teńgege jetken. Sot sheshimimen onyń bas bostandyǵy bir jylǵa shekteldi.
Qazirgi ýaqytta taǵy bir boryshkerdiń isi sotqa jetti, taǵy eki qylmystyq is boıynsha sotqa deıingi tergeý amaldary júrgizilip jatyr.

Sonymen qatar, alıment óndirý týraly sot aktilerin oryndamaǵan 158 boryshker ákimshilik jaýapkershilikke tartyldy. Onyń ishinde 54 is tikeleı prokýrorlardyń bastamasymen qozǵalǵan.
Sottardyń qaýlysymen 91 boryshker 1 táýlikten 5 táýlikke deıin ákimshilik qamaqqa alynsa, 3 boryshker 10 saǵattan 20 saǵatqa deıin qoǵamdyq jumystarǵa tartyldy. Budan bólek, 64 alıment tóleýshige jalpy somasy 1,2 mıllıon teńge aıyppul salyndy, onyń 705 myń teńgesi óndirildi.

Boryshkerlerge qatysty ózge de májbúrleý sharalary keńinen qoldanylady. Máselen, 44 alıment tóleýshige elden shyǵýǵa, 103 boryshkerdiń múlkine yıym salyndy. Sot oryndaýshylardyń usynystary boıynsha 97 boryshkerdiń kólik quraldaryn basqarý quqyǵy ýaqytsha shekteldi.

Іzdeý jarııalanǵan 71 boryshkerdiń 44-iniń júrgen jeri anyqtaldy. Sonymen qatar, alıment óndirip alý máselesi boıynsha jyl basynan beri atqarý organdaryna zań buzýshylyqtardy joıý týraly 18 usyný engizilip, 20 sot oryndaýshysy tártiptik jaýapkershilikke tartyldy.
Alıment tóleýshilerdi jumyspen qamtý baǵytynda 58 is-shara uıymdastyrylyp, nátıjesinde 325 boryshker turaqty jumyspen qamtyldy.

Prokýrorlardyń aıtýynsha, munyń bári nátıje berip jatyr. Alıment boıynsha jalpy bereshek kólemi 2,6 mlrd teńgeden 1,5 mlrd teńgege deıin qysqardy. Qazirgi tańda óńir boıynsha esepte turǵan 10 myń boryshkerdiń 304-i qasaqana alıment tólemeýshiler sanatyna jatady. Olardyń jalpy qaryzy 338 mln teńge.

Buǵan deıin Almatyda 4 mln teńge utyp alǵan er adam alıment tólemeı kelgeni úshin sottalǵanyn jazǵan edik.