SQO-da qarjylyq zań buzýǵa jol bergen 13 laýazymdy tulǵa jazalandy
PETROPAVL. KAZINFORM — Soltústik Qazaqstan oblysynda bilim salasyna bólingen qarjyǵa aýdıt júrgizilip, 99,3 mln teńgeniń orynsyz jumsalǵany anyqtaldy.
SQO boıynsha tekserý komıssııanyń málimetinshe, memlekettik aýdıt nátıjesinde 18 mln teńge somasyna qarjylyq zań buzý tirkelgen. Bul qarajattyń barlyǵy bıýdjetke qaıtarylýy tıis. Sonymen qatar aýdıt barysynda 58,8 mln teńge bıýdjet qarajatyn tıimsiz josparlaý jáne 22,6 mln teńge bıýdjet qarajatyn tıimsiz paıdalaný faktileri anyqtalǵan.
Sondaı-aq bilim berý uıymdary qyzmetkerleriniń eńbekaqysyn tóleý kezinde qoldanystaǵy zańnama men normatıvtik quqyqtyq aktiler talaptary buzylǵan.
Atap aıtqanda, pedagogtardyń eńbek ótilin esepteýde, qosymsha aqylar men ústemeaqylardy, syılyqaqylardy jáne basqa da tólemderdi taǵaıyndaý kezinde qatelikter jiberilgen.
Aýdıt barysynda qyzmetkerlerge eńbekaqy tóleý satysyn jáne pedagogıkalyq eńbek ótilin qate esepteý faktileri anyqtalǵan.
Budan bólek, tıisti oqý júktemesi bolmasa da, tipti, synaq merziminen ótip jatqan qyzmetkerlerge nemese tártiptik jazasy alynbaǵan adamdarǵa syılyqaqy tóleý, biliktilik sanaty úshin qosymsha aqylardy negizsiz esepteý jaǵdaılary da tirkelgen. Sonymen qatar jalaqysy saqtalmaıtyn demalys kezeńi úshin tólemder júrgizilgeni jáne saýyqtyrý járdemaqylarynyń eki ret eseptelgeni anyqtalǵan.
Keı jaǵdaıda esep aıyrysý-tólem qujattarynda kórsetpeı aqsha tóleý jáne keıbir laýazymdy tulǵalarǵa jalaqyny artyq esepteý derekteri bolǵan.
Memlekettik aýdıt barysynda bıýdjet qarajatyn tıimsiz josparlaý faktileri de anyqtaldy.
Máselen, bilim berý uıymdarynda normatıvten tys shtat birlikterin — mektep dırektorlarynyń orynbasarlaryn, vahterler men hatshylardy ustaý jaǵdaılary tirkelgen.
Sonymen qatar Ahmetjan Qazymbetov atyndaǵy aýdandyq ortalyq stadıondy kúzetý úshin shtat birlikterin ustaý da bıýdjet shyǵyndarynyń negizsiz ulǵaıýyna alyp kelgen.
Júrgizilgen memlekettik aýdıt qorytyndysy boıynsha 13 laýazymdy tulǵa tártiptik jaýapkershilikke tartyldy. Sonymen qatar anyqtalǵan zań buzýdy joıý úshin 6 usynym men tapsyrma berildi.
Buǵan deıin Shymkentte bilim berý uıymdarynda 700 mln teńgeden astam qarjy zańsyz tólengenin jazǵan edik.
