SQO-da qarttar úıinde turyp jatqandardyń eń úlkeni — 98 jasta
PETROPAVL. KAZINFORM — Soltústik Qazaqstan oblysynda memleket qaramaǵyndaǵy eki qarttar úıi jumys isteıdi. Ókinishke qaraı, mundaı ortalyqtarǵa suranys bar, jylda qarttardyń ınternat-úıleri 50 shaqty adamdy qabyldaıdy.
Áleýmettik qyzmet kórsetý ortalyǵy dep atalǵan bul mekemeniń bireýi Aqqaıyń aýdanynyń ortalyǵy Smırnov eldi mekeninde ornalasqan.
275 orynǵa shaqtalǵan qarttar úıinde qazir 235 adam turyp jatyr.
Ekinshisi Taıynsha aýdanynda ornalasqan. «Nadejda» atty qarttar úıi 100 oryndyq, búginde 89 adam turady.
«Áleýmettik qyzmet kórsetý ortalyǵynda óz betinshe ómir súrýge qaýqarsyz, densaýlyǵyna baılanysty statsıonar jaǵdaıynda arnaýly álemettik kómekke muqtaj qarttar men múgedektigi bar adamdar turady. Bul mekemege erejege sáıkes birinshi jáne ekinshi toptaǵy múgedektigi bar adamdar, eńbekke qabiletti kámeletke tolǵan balalary joq qart adamdar, balalary bolsa da obektıvti sebepter boıynsha, máselen, birinshi, ekinshi toptaǵy múgedektigi, onkologııalyq, psıhıkalyq aýrýlary bar, bas bostandyǵynan aıyrý oryndarynda júrgen, psıhıkalyq densaýlyq ortalyǵynda esepte turǵan nemese bas bostandyǵynan aıyrylǵandyqtan turaqty kómek pen kútimdi qamtamasyz etpeıtin zeınetkerler qabyldanady. Desek te, áleýmettik qyzmet kórsetý ortalyǵy qazirgi ýaqytta tolyq emes, ornalasý úshin kezekke turǵandar joq», — deıdi SQO jumyspen qamtýdy úılestirý jáne áleýmettik baǵdarlamalar basqarmasynyń basshysy Rınat Eljasov.
Jyl saıyn ortalyqtarǵa orta eseppen 50-ge jýyq muqtaj azamat jiberiledi. Bıyl Smırnovtaǵy qarttar úıi 32 adamdy, «Nadejda» ortalyǵy 10 adamdy qabyldaǵan.
Jalpy, óńirdegi áleýmettik qyzmet kórsetý ortalyqtarynda turyp jatqandar qart adamdardyń orta jasy — 75-te. Jasy 90-nan asqandar altaý, sonyń ishinde eń jasy úlkeni — 98 jastaǵy áıel. Smırnov qarttar úıinde 27, «Nadejda» ortalyǵynda 9 qazaq turyp jatyr.
«Mekemelerde normaǵa sáıkes bes rettik tamaqtandyrý bar. Arnaıy jaraqtandyrylǵan kabınetterde súıikti isterimen aınalysa alady, sheberhanalar jumys isteıdi. Kórkem óner úıirmesi ashylǵan, ortalyqta túrli keshter, kontsertter, sporttyq is-sharalar, ekskýrsııalar uıymdastyrylady. Densaýlyqtary da únemi nazarda, massaj, stomatologııaǵa, fızıo emdeýge jáne emdik dene shynyqtyrýǵa arnalǵan kabınetter bar», — deıdi Rınat Eljasov.
Buǵan deıin SQO-da qasaqana alıment tóleýden jaltarǵandardyń boryshy 250 mln teńgeden asyp ketkendigin jazǵan edik.
