SQO-da Qarttar kúnine oraı zeınetkerlerge otyn, azyq-túlik, dári-dármek taratylady
PETROPAVL. QazAqparat – Soltústik Qazaqstan oblysynda 104 myńnan astam zeınetker bar, onyń 23-i Uly Otan soǵysynyń ardageri, dep habarlaıdy QazAqparat tilshisi.
SQO-da Qarttar kúnine oraı birqatar is-shara qolǵa alynbaq. Ardagerler keńesiniń tóraǵasy Eskendir Eleýsizovtiń aıtýynsha, eń aldymen muqtaj zeınetkerlerge otyn-kómir túsirilip, azyq-túlikpen, dári-dármekpen qamtamasyz etiledi. Qarttardy qoldaý aılyǵy aıasynda ár demalys kúnderi aýyl sharýashylyǵy taýaryn óndirýshilerdiń jármeńkesi uıymdastyrylmaq.
«Qarttarymyzǵa jyl boıy qurmet kórsetilse de bolar edi. Aılyq aıasynda olarǵa barynsha qoldaý kórsetýge tyrysamyz. Medıtsına mekemeleri ashyq esik kúnderin uıymdastyrady, júre almaıtyndaryna úılerine baryp qyzmet kórsetedi. Qazir óńir boıynsha Smırnov pen Taıynshada eki qarttar úıi bar. Sonda baryp, qoldaý kórsetýdi josparlap otyrmyz. Sondaı-aq bıyl tek birinshi qazan – Qarttar kúni ǵana emes, zeınetkerlerimizge aı boıy qoǵamdyq kólikte tegin júrýdi uıymdastyrýǵa qalalyq ákimdikke usynys berdik», - deıdi SQO Ardagerler keńesiniń tóraǵasy Eskendir Eleýsizov.
Bıyl sanıtarlyq talaptardy saqtaı otyra ujymdarda merekelik is-sharalar da uıymdastyrylmaq, múgedek, zeınetker adamdardy áleýmettik qorǵaýda belsendilik tanytyp, qaıyrymdylyq kórsetip júrgen adamdar da marapattalmaqshy.
«Ókinishke qaraı ardagerlerimizdiń qatary kúnnen-kúnge sırep barady. Bıyl Jeńis merekesin Ekinshi dúnıejúzilik sońystyń 52 ardageri qarsy alsa, búginde olardyń sany eki ese azaıǵan. 23 ardagerdiń 19-y Petropavlda, 4-ýi aýdandarda turyp jatyr. Bizde 5 myńnan artyq tyl eńbekkeri bar. Onyń 137-si orden-medaldarmen marapattalǵan. 670-ten astam Aýǵan soǵysynyń ardageri bar. Jalpy oblysta 104 myńnan astam zeınetker bar», - deıdi Eskendir Eleýsizov.
