SQO-da qardan jasalǵan Aqorda paıda boldy
PETROPAVL. QazAqparat - Soltústik Qazaqstan oblysynyń Aıyrtaý aýdanyna qarasty Saýmalkól kenti qardan jasalǵan Aqorda, Han Shatyr, Qarasaı men Aǵyntaı batyr memorıaldyq keshenderimen bezendirdi, dep habarlaıdy «QazAqparat» HAA tilshisi.
Aýdan ortalyǵyndaǵy basty alańǵa ornalastyrylǵan qardan jasalǵan pishinderdi mektep pedagogtary jasady. «Han Shatyr» OSO-ny Saýmalkól qazaq orta mektebiniń ujymy qardan qalasa, Aqordanyń ǵımaratyn - ata-analar qamqorlyǵynsyz qalǵan balalar men jetim-balalarǵa arnalǵan Aıyrtaý mektep-ınternaty ázirledi. Qarasaı men Aǵyntaı batyr shaǵyn memorıaldyq keshenin №1 Saýmalkól orta mektebiniń ustazdary jasady.
«2016 jyly bizdiń elimiz mańyzdy tarıhı datany - Táýelsizdiktiń 25 jyldyǵyn atap ótti. Uıymdastyrý komıtetinde merekege oraı aýdandy bezendirý máselesine toqtalǵanda, Qazaqstannyń brendin tanystyrý kerektigin sheshti. Bul ıdeıany mektep ujymy qoldady. Qalashyqty jeltoqsannyń ortasynda ázirledik», - dep málim etti Aıyrtaý aýdandyq ishki saıasat bóliminiń jetekshisi Jaqsylyq Júsipov.
