SQO-da qaraýsyz júrgen júzden astam jylqynyń ıesi izdestirilip jatyr

PETROPAVL. QazAqparat – Soltústik Qazaqstan oblysynda polıtseıler baǵýsyz júrgen 100-den astam jylqynyń ıesin izdestirip jatyr. Tártip saqshylary mal qojaıynyna aıyppul salmaq, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Taıynsha aýdanynda polıtseıler qaraýsyz júrgen 100 bastan asatyn úıir-úıir jylqyny anyqtady. Olardyń ıesin izdep-tabý boıynsha sharalar qolǵa alyndy. Maldyń qojaıyny QR Ákimshilik quqyq buzýshylyq týraly kodekstiń 408-baby boıynsha jaýapqa tartylatyn bolady.

Tártip saqshylary maldyń erkin jaıylýy mal urlyǵyna jaǵdaı jasaıtyny týraly, qańǵyp júrgen mal jolǵa shyǵyp, jol-kólik oqıǵasyna sebepker bolýy múmkin ekendigin eske saldy.

«Oblysta mal urlyǵynyń tómendegeni baıqalady. Jyl basynan osyndaı 21 qylmys tirkelgen, ótken jyldyń uqsas kezeńinde 31-i anyqtaldy. Osyndaı qylmystardyń aýyr túri aıtarlyqtaı tómendedi, ótken jyly 23 bolsa, bıyl 9 fakti tirkelip otyr. Túlikti erkin jaıý qaǵıdalary engizilmeı turyp, oblysta mal urlyǵy birneshe esege kóp bolatyn. Mal ıeleri men baqtashylardyń jaýapkershiligin arttyrý – mal urlyǵynyń aldyn alýda nátıje berip jatyr», - deıdi SQO Polıtsııa departamenti krımınaldyq polıtsııa basqarmasynyń bastyǵy Marat Jumalıev.

Aýdandarda polıtsııa bóliminiń qyzmetkerleri maldyń qaraýsyz júrý faktilerin anyqtaý maqsatynda jumys istep jatyr. Halyqqa zańnama talaptary, maldy uıymdasqan túrde jaıý maqsatynda jasalatyn úsh jaqty sharttardyń basymdylyǵy túsindiriledi.

Jyl basynan maldy qaraýsyz jibergeni úshin 4030 adam jaýapkershilikke tartyldy. Arnaıy ustaý oryndaryna qańǵyp júrgen 11 myńnan astam mal ornalastyryldy.