SQO-da qarashada 25 gradýsqa deıin aıaz bolýy múmkin
PETROPAVL. QazAqparat – Soltústik Qazaqstan oblysynda sınoptıkter aldaǵy bes aıǵa aýa raıynyń boljamyn jasady, dep habarlaıdy QazAqparat tilshisi.
Óńirlik kommýnıkatsııalar qyzmetinde «Qazgıdromet» RMK Soltústik Qazaqstan fılıaly dırektorynyń orynbasary Natalıa Levınanyń aıtýynsha, bıylǵy qys klımattyq normaǵa sáıkes bolmaq. Máselen qarasha aıynda aýanyń ortasha temperatýrasy -6-8 gradýs shamasynda kútilýde. Alǵashqy onkúndik jyly bolmaq, túnde +2-den -13 gradýsqa deıin tússe, kúndiz +2 men +10 aralyǵynda bolmaq. Ekinshi onkúndikte kún sýytyp, túnde -25, kúndiz -13 gradýsqa deıin synap baǵanasy tómendeıdi. Úshinshi onkúndikte aıazdyń beti qaıtyp, óńirdiń shyǵysynda aýa temperatýrasy +3 gradýsqa deıin jylynýy múmkin. Jaýyn-shashyn aıdyń basy men ortasynda jaýyp, qarashanyń sońyna deıin tuman men kóktaıǵaq bolady dep kútilýde.
«Jeltoqsan aıynda borandy kúnder kóp bolady. Ortasha aýa temperatýrasy -12-14 shamasynda, bul – normaǵa sáıkes. Alǵashqy onkúndik aıtarlyqtaı jyly, kúndiz – 0 men -5 gradýs aralyǵynda bolsa, ekinshi onkúndikte -15-ke deıin sýytady. Túnde synap baǵanasy -25 gradýsqa deıin tómendemek. Al úshinshi onkúndikte kúndiz -20-25 gradýs, túnde -35 gradýsqa deıin aıaz bolady», - deıdi Natalıa Levına.
Soltústik óńirde qańtar – qystyń qaharyna minetin ýaqyty. Sınoptıktiń aıtýynsha, bıyl da qańtar aıy aıazdy bolmaqshy.
«Aýa raıyna Mońǵol (Sibir) antıtsıklony áser etedi. Túnde synap baǵanasy -35-40 gradýsqa deıin tómendeıdi. Aıdyń ortasha aýa temperatýrasy normaǵa sáıkes -17-20 gradýs shamasynda bolady. Jaýyn-shashynda ádettegideı – 14-23 mm jaýady. Antıtsıklonnyń saldarynan qalyń qar jaýyp, boran turady. Aqpan aıy qańtarǵa uqsas. Aýa temperatýrasy ortasha 14-16 gradýs shamasynda bolmaq», - deıdi Natalıa Levına.
Naýryz – kóktem aıy bolǵanymen, Soltústik Qazaqstanda áli de qys jalǵasady.
«Boljam boıynsha jyldaǵydan -1,-2 gradýsqa sýyq bolady, norma -7 men -9 aralyǵynda. Aýa raıy qubylmaly. Keı jerlerde mólsherden artyq qar jaýady. Ekinshi onkúndikte de boran turady. Aı boıy kóktaıǵaq bolyp, qar aralas jańbyr jaýady», - deıdi «Qazgıdromet» RMK Soltústik Qazaqstan fılıaly dırektorynyń orynbasary Natalıa Levına.
